WILLEMSTAD.- Minister dimenshonario i miembro di Partido Nashonal den un karta ekstenso pa direktiva di e partido bèrdè, Señora Suzy Camelia Römer no ta dispuesto pa subi lista di PNP pa próksimo elekshon 28 di aprel 2017.

Esaki el a bisa di ta hasi ku duele di su kurason.

Malkontentu enorme den Partido Nashonal i ku a trese un divishon den e miembresia i den e representantenan máksimo di e partido. Den su karta ayera sra Suzy Camelia Römer ta menshoná e reunion yama pa ayera, kumpliendo ku e petishon di un kantidat di miembro pero ku ta keda posponé te un próksimo aviso. Echo ta ku e tópiko di e reunion tabata e desishon riba kabes di lista di PNP pe próksimo elekshon ku ta importante mirando ku aki 3 (2) dia ta entrega di lista pa por partisipá na elekshon di 28 di aprel.

Sra Camelia Römer ke sa kiko ta e problema pa a laga miembronan bin huntu ayera. E echo legalista ku e reunion di miembresia general pidi 28 di febrüari último a keda yama djadumingu 5 di mart pa tuma lugá djamars 7 di mart i ku presidente no por a tene kuenta ku e periodo statutario di artíkulo 33 insiso 2 di statutonan di PNO mirando e urgente di e petishon? Of pa motibunan imprevisto i organisatorio manera e email di presidente ta bisa?

Direktiva a disidí resientemente riba insistensia di e lider polítiko ku a splika públikamente despues di elekshon di òktober 2016 ku el a pidi pa kuminsá e proseso pa kambia lider, ku ta e lider polítiko aktual mes ta keda komo kabesante di lista pa elekshon di aprel 2017 sin sikiera tende konseho di partido. Esaki apesar ku tabatin miembronan di direktiva ku si a proponé pa konsulta ku Konseho di partido.

Sra Römer mas aleu ta bisa den su karta ku otro desaroyo pekuliar ta ku durante wikènt ku a pasa un miembro prominente di PNP ku alabes ta miembro di direktiva i ku tabata riba lista pa último elekshon i ku a logra 2% di voto a manda un karta pa informá ku e ke bai un “verkiesbare plaats’ riba lista pa elekshon 2017. Esaki na momentu ku PNP a saka pa promé biaha den hopi aña 2 asiento i de echo ta 2 ‘verkiesbare plek’ tin. Kiko esaki ta nifiká pa PNP? Komo kandidato ku a trese 49% di voto pa PNP lo no tabata lógiko pa sra Römer tin partisipashon pa formulashon di  e lista? Asina su karta ta sigui bisa.

“Mi a puntra lider (ku a logra 24% di voto pa PNP komo number un riba lista) dilanti di diferente persona di PNP durante kombersashon riba lista, dikon e no ta di akuerdo pa ami bai komo number unu  riba lista siendo ku esaki lo trese un máksimo resultado pa PNP. Ta apesar 5 di òktober por medio di elekshon e máksimo ekspreshon di bos di pueblo a papia palabra kla”, asina sra Camelia Römer ta sigui bisa den su karta.

E ta bisa ku durante i despues di elekshon a krea impreshon serka hopi hende den i for di partido komo sifuera sra Camelia Römer ta riba su mes a kore kampaña personal, siendo ku ta direktiva diario di partido den presensia di e lider a pidi sra Camelia Römer na mas ku un okashon pa e kore su mes kampaña personal paso partido mester dje votonan.

“Despues di elekshon e trato di diferente miembro di direktiva pa ku mi komo sifuera mi ta persona non grata siendo ku ta miembronan di PNP a proponé mi pa bira minister pa fortifiká PNP, a bira mas fuerte i hasi vários esfuerso pa ekskluí mi di partisipashon”.

Sra Camelia Römer a papia den último elekshon ku e komishon di sabio liberá  pa un eks presidente di PNP pa atendé entre otro e asuntu di liderazgo i el a deliñá kiko e ta pensa i deskirbi por eskrito pa ku tur órgano di PNP kon na su opinion e forma di hiba liderato a hiba na desfunkshonamentu di tur e órganonan di partido. E echo aki el a papia solamente ku e komishon di sabio i esei ta prueba ku na niun momentu por tilde di a humiá lider di PNP.

Mas aleu el a trese dilanti di moveshonnan interno pa difamá entre otro su persona por ehèmpel kaminda e lider ta bisa di no tabata na altura di e desishon pa disolvé parlamento siendo ku tur dos minister di PNP a papia ku e lider promé ku e desishon di Konseho di Minister i Suzy Camelia Römer a papia ademas ku presidente i tur dos a bai di akuerdo pa disolvé Staten.

Despues ku a posponé e reunion di ayera, sra Camelia Römer a yega na e konklushon ku e urgensia ku e ta sinti i e importansia ku e ta duna na bienestar di Kòrsou i e balornan kristian demókrata no mas ta guia desishonnan di sierto personanan den e órganonan di PNP.

Ultimo elekshon a mustra ku lider polítiko a bolbe bai atras na voto pa di tres biaha sigui. I despues ku a kanselá e reunion di ayera sra Camelia Römer a keda aserká pa un grupo aun mas grandi di persona ku e petishon pa e hala atras pasobra di e forma aki di partido no ta respetá dignidat ni di e miembronan ni di su votadónan.

I p’esei despues di amplio konsiderashon e ta konkluí ku e mensahe di direktiva di PNP pa ku su persona ta ku no opstante ku nan konosé su pensamentunan relatá den e rapòrt traha despues di elekshon pa e komishon di Sabio, no ta duna esaki niun klase di balor pa ni sikiera por diskutí.

Ayera tardi 3 ‘or presidente di partido den presensia di komishon di lista aktual a informe telefónikamente ku lider polítiko no a bai ni sikiera di akuerdo pa aseptá e invitashon di e komishon di lista pa un kombersashon tokante di e lista pasobra e ta para riba ku direktiva a nombr’é na number 1 riba e lista i e no tin nada di papia.

“Bou di e kondishonnan deskirbi den e karta aki i respetando 3442 persona ku a depositá nan konfiansa den su persona komo polítiko i mandatario, no tin sentido pa sra Camelia Römer sigui lucha den e partido ku su tata a yuda lanta komo lider den bario i ku su mama a djòin na 1949 i a sirbi den diferente funshon. Komo konsekuensia sra Camelia Römer ta informá direktiva ku hopi duele den su kurason ku e no ta dispuesto pa subi lista di PNP pa próksimo elekshon pa 28 di aprel 2017”, asina sra Camelia Römer a terminá su karta.

Bron: Extra