WILLEMSTAD.- Gabinete Koeiman ta desidido pa atendé ku urgensia e problemátika di “dropouts/pushouts”. Esaki ta loke tin pará den e akuerdo di gobernashon 2016 – 2020.
E gabinete aki a bisa di lo pone atenshon na maestro i dosentenan. Konsiderando e importansia pa tin sufisiente maestro bon prepará pa guia hubentut, gobièrnu lo dediká atenshon spesial na preparashon di maestronan di skol i dosentenan i rekonosementu di e profeshon i su kondishonnan laboral. Huntu ku esaki lo introdusí sistemanan nobo pa evaluá e kalidat di dosentenan, introdusí formanan di rekapasitashon kontinuo pa maestronan i insentivonan pa maestronan ku ta funshoná bon. Tambe lo bin ku un maneho pa kombatí skarsedat direkto di maestronan.
Pa loke ta trata alumno, studiante i mayornan, e gabinete aktual lo bai atendé ku urgensia e problemátika di ‘dropouts/pushouts”, un fenómeno ku no opstante lei di enseñansa obligatorio te ainda ta eksistí, spesialmente bou di muchanan hòmber. Tambe lo evaluá e proyekto “rebound”. Esaki ta nifiká ku mester krea un maneho kon, huntu ku otro ministerionan i ku envolvimentu di mayornan, por tene hóbennan na skol durante oranan di skol.
Enseñansa regular ta e promé ruta pa loke ta e suministrashon di edukashon na poblashon. Esnan ku ta kai den Enseñansa Obligatorio, inkluso imigrantenan ku nan permanensia no ta formalisá, mester ta na skol partisipando den enseñansa regular. Despues di e edat di enseñansa obligatorio, edukashon i formashon mester kontinuá pa esnan ku ke esei, pasobra den enseñansa no tin mag di tin blokeonan pa sigui studia. Ademas gobièrnu a bisa di lo entamá un proseso pa eliminá opstákulonan pa enseñansa permanente, p’asina pueblo siña balorá i apresiá ku no opstante edat semper un persona (hóben adulto/adulto) por sigui siña òf siña algu nobo i asina mantené un partisipashon real den su komunidat.
Den e konteksto aki, lo averiguá posibilidatnan pa introdusí finansiamentu/beka di estudio pa adultonan ku ainda ke forma nan mes profeshonalmente. Lo mester evaluá e maneho aktual di finansiamentu pa trese esaki mas den konkordansia ku e plan di Desaroyo Nashonal. Tambe lo sigui ku e programa di alfabetisashon (funshonal) pa por eradiká e problema analfabetismo den pais.
Finalmente lo ke mira Bibliobus ku mas frekuensia den barionan. Esaki mester bai huntu ku un promoshon masal i efektivo di lesamentu.
Bron: Extra