WILLEMSTAD.- Algun tempu pasá Stichting Tegen Kindermishandeling a tene un enkuesta bou di un grupo grandi di persona den komunidat pa sa kiko ta nan nivel di konosementu pa loke ta e malesa i viro di HIV/AIDS.
E konklushon ku e fundashon por tuma for di e resultado di e enkuesta ta ku tin un nesesidat grandi di mas i mihó informashon riba HIV/A.I.D.S. i malesanan transmití seksualmente. Esei di akuerdo ku sra. Coraline Kooistra di e fundashon menshoná.
Segun Kooistra, e falta di informashon aki ta un di e motibunan prinsipal pa e tantísimo kasonan di infekshon ku e viro. Aparte di e falta di informashon aki tin un negligensia i ignoransia serio. Maske ku hopi no ta na altura, tòg nan no ta hasi e esfuerso èkstra pa informá nan mes ni tampoko pa protehá nan mes. Loke ta nifiká ku banda di informashon ta importante pa yega na un kambio di mentalidat pa ku e problema di A.I.D.S.
Segun Kooistra, ku e nesesidat di mas informashon riba HIV/A.I.D.S., Stichting Tegen Kindermishandeling lo kontinuá ku e siguiente partinan di e Proyekto Sero ku ta training na 30 persona ku lo tin na nan enkargo e seshonnan di informashon i edukashon na skolnan, organisashonnan, kompanianan i medionan di komunikashon. Di e forma aki por akapará un parti muchu mas grandi di e poblashon i por yega na mas konsientisashon i redukshon. E trainingnan no solamente ta enfoká riba prevenshon di HIV/A.I.D.S. pero tambe riba malesanan transmití seksualmente (MTS) sigur teniendo kuenta ku e peligernan di esakinan pa salú di hende.
Na momentu ku e fondonan pa kubri e Proyekto tan importante i nesesario aki drenta, lo start mesora ku e trainingnan. Ta e intenshon pa start ku e trainingnan na yanüari 2017. E trainingnan lo wòrdu fasilitá pa sra. Kooistra kende a risibí su preparashon di PAHO (Pan American Health Organisation) i UNAIDS. Ya pa kasi 30 aña kaba Kooistra a bin ta eduká hóbennan riba tereno di seksualidat i HIV/A.I.D.S. huntu ku e motor inmortal tras di e lucha ku ta Zùster Monica Kapel Mattheeuw q.e.p.d. – Zuster Kapel manera nos tur konosé tabata kordinadó di A.I.D.S. na Antia ya for di 1985. Huntu ku Dr. Joe Eustacia, fundadó di A.I.D.S. Stichting Nederlandse Antillen i Dr. Cai Winkel, internista, q.e.p.d. a trata di kibra e tabú, konsientisando míles i skapando míles di bida.
Segun sra. Kooistra, e seshonnan di informashon lo wòrdu duná na personanan for di 10 aña di edat i meta ta pa por presentá e proyekto na TUR skol i organisashon di hubentut i adulto di Kòrsou. Organisashonnan por tuma kontakto ku Stichting Tegen Kindermishandeling for di awor pa reservá nan fechanan.
Bron: Extra