WILLEMSTAD.- ‘Frakshon di MAN ta di opinion ku mirando kon krímen organisá ta asotando nos pais, ta sumamente importante pa nos tin un kuerpo polisial riba nivel ku ta ekipá pa por kombatí kriminalidat na un manera efektivo.
P’esei pa nos un estudio ku por prepará nos polisnan debidamente, tantu den ‘field’ i den maneho, ta karga nos aprobashon sin mas.” Asina Elsa Rozendal, parlamentario pa partido MAN a splika, relashoná ku e reunion di parlamento ku a tuma lugá djamars pasá tokante un estudio di ‘bachelor’ pa polis. Frakshon di MAN a sostené plan di minister di Hustisia Nelson Navarro. Rozendal ta splika: ‘Hopi hende a aserká mi despues di e reunion públiko tokante “Bachelor in Policing” pa puntra mi dikon nos frakshon a bai di akuerdo pa e proyekto “Bachelor in Policing” sigui.”
Rozendal: ‘Frakshon di MAN, huntu ku e otro frakshonnan ku ta formando un gobièrnu nobo a entregá un moshon kaminda ta pidi Minister Navarro pa kontinuá ku e trayekto di e estudio aki i alabes pidi e Minister pa manda e ‘dossier’ kompleto pa parlamento. Esaki ta duna frakshon di MAN espasio pa repasá tur e dokumentonan i asina yega na un pensamentu ophetivo di e proseso ku e minister a kana pa yega na otorgamentu di e proyekto na un instansia partikular.”
Rozendal: ‘Frakshon di MAN den kuadro di su filosofia di Transparensia, Kòntròl i Bon Gobernashon i tambe den kuadro di su moshon a manda un karta pa Minister Navarro ku e petishon pa hasi entrega di e ‘dossier’ na parlamento.”
Bron: Extra