WILLEMSTAD.- Minister enkargá ku asuntunan di Reino sr. Ronald Plasterk a splika Tweede Kamer riba e situashon aktual di Venezuela. Segun minister Plasterk durante di e último dos lunanan e situashon na Venezuela no a mehorá.
E tenshon polítiko i polarisashon a oumentá dor di e elekshon pa kambio di nan konstitushon. Ultimo lunanan Merka a trata di pone preshon pa medio di sanshon. Un total di 38 personanan tòp di Venezuela a keda pone riba lista di sanshon.
A pone restrikshon di biahe pa nan i tambe a fris nan fondonan. Dia 24 di ougùstùs presidente merikano Trump a impedí pa merikanonan hasi negoshi ku gobièrnu di Maduro. A prohibí di hasi negoshi ku PDVSA.
Mas aleu Plaster a indiká ku si mester bai sanshon individual manera Merka a indiká lo papia ku Aruba Kòrsou i St. Maarten pa atendé ku interesnan di henter Reino. Pasobra sanshonnan por tin konsekuensia pa ku islanan ABC, mirando e lasonan ekonómiko ku tin ku Venezuela.
Un kalkulo ta indiká ku lo tin 1500 ulandes ku ta kedando na Venezuela. Un parti di e personanan ulandes aki tin pasport ulandes i tin nan rais den e parti Karibe di Reino. Embahada ulandes a pone seshon di informashon i pa e ulandesnan registrá pero solamente 132 di kual 45 famia a hasi uso dje registrashon.
Ulanda no ta mira motibu urgente pa saka ulandesnan for di Venezuela. Pa loke ta trata e ola di venezolanonan ku ta yega nos islanan, minister Plasterk a indiká ku Wardakosta a intensivá su patruyanan di kòntròl. E último sifranan ku e tabatin di e aña aki i Wardakosta ta indiká ku a “detené” 245 venezolano indokumentá di kual 220 na Kòrsou, 22 na Aruba i 3 na St. Maarten.
Bron: Extra