WILLEMSTAD.- Segun Minister di Hustisia, mr. Quincy Girigorie, e posishon ku el a asumí anunsiando ku lo stòp di usa fasilidatnan na Barber i Rio Canario pa detenshon di periodo largu, a ser bon risibí.
Tabatin i tin komprenshon pa su posishon, i ta konhuntamente ku esnan responsabel pa e kapasidat di detenshon ta buskando i hañando solushon. Asina e mandatario a duna di konosé den un deklarashon na EXTRA ayera nochi. T’asina ku den kurso di ayera mainta e Minister a sostené un reunion ku e grupo ku ta responsabel pa e kapasidat di detenshon riba Kòrsou. Esaki a sosodé komo resultado di su desishon ariba menshoná.
Den e reunion ei a deliberá pa wak den ki otro forma lo por usa e fasilidatnan ei, kisas pa sera hendenan indokumentá ku ta sperando riba nan deportashon. A bini diferente idea dilanti pero ku tin di ser evaluá. Nan lo por ser usá si surgi un situashon eksplosivo unda tin di sera hopi hende na mes momentu. Nos a puntra sr. Girigorie kiko tabata opinion di esnan ku ta supervisá e fasilidatnan aki, i el a deklará ku generalmente su posishon a ser bon risibí, aunke tin di rekonosé ku e ta trese sierto doló di kabes kuné. Tur hende ta konsiente ku e situashon no ta akseptabel manera e ta, pero e ta kousa un tiki inkomodidat.
E desishon a pone ku mester tuma sierto akshonnan, segun e Minister, i aktualmente nan ta trahando riba e akshonnan nesesario i apropiá pa por sigurá ku detenidonan por keda detené korektamente. Sin ke antisipá riba muchu kos i bai den detaye, e titular di hustisia a deklará ku por bisa ku for di ayera a yega na sierto desishonnan konkreto kaba. Pero a palabrá ku e grupo ku lo sinta atrobe djaweps awor pa deliberá. Tin desishonnan ku mester di aprobashon di Konseho di Minister, i eseinan lo por tuma lugá awe den e reunion semanal di Gobièrnu. Na su opinion, si konkretisá e desishonnan ei lo por papia di un maneho un tiki mas fiho awor.
Den kuadro di tur esaki, Ministerio Públiko lo bai hasi su propio kòntròl na e fasilidatnan na Barber, i lo por spera medida/akshon riba término kòrtiku.
Bron: Extra