WILLEMSTAD.- Tin duda si tin un base hurídiko korekto pa saka Jules Ilario komo hefe di Duana di Kòrsou. Asina korant EXTRA a komprendé for di algun fuentenan. Manera ta konosí e siman aki a bira konosí ku hefe di Duana di Kòrsou, Jules Ilario, definitivamente lo no regresá den e kuerpo.

Esei ta loke Minister di Finansa, sr. Kenneth Gijsbertha, a informá sindikato ABVO den un karta ofisial. E desishon a kai komo resultado di rekomendashonnan di e rapòrt ku a ser trahá riba e funshonamentu i ròl di Ilario den e kuerpo aki.

E rapòrt a keda traha dor di dos persona. Segun Disposishon Ministerial di minister di Finansa komishon mester eksistí di tres persona. Dia 5 di mei 2017 e minister di Finansa den e tempu ei, sra. Lourdes Alberto, a duna di konosé ku e komishon di konseho Duana mester konsistí di tres miembro.

Den e disposishon ministerial ta skirbi ku e komishon ta konsistí di dos miembro, ku ta Ersilia di Lannooy I Gregory Damoen. Den e disposishon ministerial ta skirbi ku ‘dentro di un siman e presidente di e komishon mester a proponé un di 3 persona na e minister pa wòrdu nombrá.’

Pero nunka esaki a sosedé. Basá riba esaki por konkluí huridikamente ku nunka e komishon no a wòrdu formalisá, no ta eksistí i pues lo no por a produsí un relato konkreto. Tampoko nunka a bin klaridat ta ken ta presidente den e komishon. Pues, segun fuente, ‘loke a wòrdu produsí ta riba título personal di e 2 personanan ku a trah’e ei i no ta válido pa gobièrnu kana ningun trayekto kuné.’

Bron: Extra