WILLEMSTAD. – Tin duda tokante posibel embolbimentu di eks-minister di Finansa José Jardim den un destaho públiko tokante instalashon di un sistema di ICT.
Na promé instansia Bearing Point a kai afó, pero despues e kompania a bin bèk riba lista di posibel partisipando.

Manera ta konosí Bearing Point Caribbean a anunsiá 18 di yanüari un kambio di liderazgo. Ku esaki eks Minister di Finansa José Jardim a asumí posishon di ‘Managing Director’.

E destaho públiko tin un historia largu. Ta trata di e proyekto di informatisashon digital na Servisio di Impuesto. E asina yamá proyekto ICT Platform Belastingdienst Curaçao. Den e proyekto aki a inskribí un total di 5 kompania konsultorio. KPMG, IBM, E&Y, Computech i Bearing Point. Dia 16 di yanüari 2014, un komishon instalá pa gobièrnu a duna di konosé ku di e sinku kompanianan, despues di analisá e ofertanan, a saka 3 afó. E&Y, IBM i Bearing Point a sigui pa e siguiente rònt. Riba 10 mart 2014 a keda di tene un presentashon i demostrashon di e modelonan presentá pa e 3 último kompanianan den kontienda. Despues di e presentashonnan i diferente reunion tumando lugá, e dos kompanianan EY i IBM a keda selektá pa bai e último rònt.

Den un karta fechá 29 di sèptèmber 2014, IBM i EY a risibí un karta ku e komishon instalá pa selektá e ganadó dje destaho, a bin kambia algun prosedura. En bes di bai hasi bishita na diferente lokalidat pa wak i analisá e sistemanan presentá di outomatisashon di impuesto, e kandidatonan a haña 10 dia pa traha riba un “test case”. I athunto den mesun karta, e komishon a manda bisa IBM i EY, ku e di tres kandidato kende tabata ta bolbe drenta i wòrdu invitá pa un demostrashon. E kandidato aki tabata Bearing Point.

Den mundu polítiko awor tin partido ku ke sa kiko a pasa den e proseso di destaho públiko i si ta bèrdat ku (eks-)Minister Jardim a hinka Bearing Point bèk den e destaho.

Bron: Extra