WILLEMSTAD.- Ayera trahadónan di Brasami a pone trabou abou. Nan no tin konfiansa den e sistema di seguridat i ta sinti nan bida na peliger.
Den deklarashon na EXTRA e trahadónan a bisa ku awor si awa a pasa hariña. Nan tin basta tempu ta soportá maltrato, menasa, intimidashon serka klientenan, sin ku nan tin hende para nan tras komo seguridat kalifiká pa sali na nan defensa.
Segun e trahadónan ántes tabata wardadónan di prezu ta vigilá e instituto aki, awor ta e kompania di seguridat Securitas ta tin e parti di vigilansia na nan enkargo.
E trahadónan ta sinti ku nan no ta sufisiente protehá. E klientenan ku nan ta traha kuné, enpartikular e hóbennan di 14 pa 18 aña ta violento i ta duna hopi problema. E baka a hoga na pos ayera ora un kliente a basha un trahadó femenino ku papa kayente. Esaki a pone ku e trahadónan a disidí ta basta.
Segun EXTRA a komprondé di e trahadónan, ta basta ratu ta papiando ku gobièrnu di e situashon i nan ta tende ku gobièrnu ta bezig i e ta bezig pero niun solushon konkreto.
Mayoria trahadó di Brasami ta hende muhé i nan ta sinti nan bida na peliger. No solamente na man di klientenan nan tin di soportá kosnan fo’i òrdu pero tambe na man di famianan. Ayera un mama ku a bin buska su yu a disidí di koba mama di lidernan di Brasami pasobra a sera tur kliente sin laga nan Sali.
Mester di un solushon rápido sino nan lo no reanudá trabou, asina e empleadonan a informá EXTRA. Te ku ayera tardi lat nan tabata sperando reakshon di minister enkargá ku hustisia pa sa kiko ta bai sosodé. Echo ta ku nan ta sinti nan bida na peliger i no ke sigui traha asina aki mas.
Bron: Extra