WILLEMSTAD.- Ministerio Públiko no tin ningun interes eksepshonal den persiguí Tromp. Tabatin mas ku un motibu pa inisiá ku investigashon kontra di Tromp i p’esei a inisiá ku e kaso.

Tromp no ta e úniko dignatario haltu ku ta hasiendo investigashon kontra di dje. Ademas investigashon kontra di Tromp no a terminá ainda, asina fiskal van der Werff a duna di konosé ayera den e “regiezitting” ku a inisiá kontra di presidente direktor di banko sentral sr. Emsley Tromp.

Tromp ta keda akusá di a kometé froude di belasting i a perhudiká Kòrsou p’e suma di 5.5 mion florin.

Fiskal van der Werff ta reakshoná riba loke defensa di presidente direktor di Banko Sentral sr. Emsley Tromp a trese dilanti, esta pa deklará ministerio públiko no atmisibel den su demanda i deklará e dagvaarding nulo. Segun fiskal van der Werff e loke ku defensa di Tromp, mr. van der Laan a trese dilanti ta sin base i meskos ku ministerio públiko no ta atmisibel den su demanda.

E abogado ta bisa ku e akusashon kontra di Tromp no ta sufisientemente bon kla kiko ta akus’é di dje. Pero den e dagvaarding tin poné bon kla kiko ta e datosnan inkorekto i intenshonalmente ku Tromp a yena pa belasting. E inkorekto ta konsistí ku kada biaha el a yena entrada personal abou òf entrada riba belasting ta abou.

Segun hurisprudensia, e eksigensianan pa pone akusashonnan den un dagvaarding por ta “tiki”. Si p’e asuntu aki mester deklará OM no atmisibel, pasó e akusado no sa di kiko ta akusá di dje, segun OM, generalmente esaki ta resultá den nada otro ku un frakaso.

E kontribushon di penshon di Banko Sentral komo entrada no ta inkorporá den e denunsiánan, pero tampoko ku e suma di doño di trabou a keda duna ménos den e “aftrekpost”. E loke ku ta forma parti di e akusashonnan ta e plakanan personal kon el a tende kuné den kaso di e plakanan di penshun.

P’esei fiskal ta pidi korte pa rechasá petishon di abogado pa deklará Ministerio Públiko no atmisibel.

Mas aleu mr. van der Werrf ta reakshoná riba e “akusashon” di abogado ku investigashon di Tromp ta unu polítiko i ku ministerio públiko a mal usa di su outoridat.

Pero kua meta polítiko e defensor di Tromp no a trese dilanti, segun fiskal.

Fiskal a desbaratá e ponensia ku Ulanda a entrega un lista di personanan ku tin di keda investigá, na TBO (Team Anti-korupshon). Esaki no ta bèrdat. TBO ta traha pa pais Kòrsou i fiskalnan tambe, segun mr van der Werff.

Bron: Extra

Vários instansia i fundashon a forma parti investigashon kontra di Emsley Tromp

WILLEMSTAD.- Di akuerdo ku fiskal van der Werff vários instansia, fundashon i notisianan a forma parti di investigashon kontra di direktor di banko Sentral Sr. Emsley Tromp.

Na promé lugá den periodo di 2011 pa 2016 tabatin un kantidat di notisia tokante di Tromp den medionan di komunikashon.

Durante di e añanan menshoná ta vários publikashon i dokumentonan a keda publiká den medionan. Den e rapòrt ku a keda traha riba Kòrsou ku e título “Doe het zelf” di 30 sèptèmber 2011, ya kaba ta papia tokante di publikashonnan rondó di Tromp tokante di un fiansa personal ku el a risibí. E komishon den e rapòrt aki ta di opinion ku hendenan tòp ku tin kargo di responsabilidat haltu i ta traha den aparato públiko ta keda atendé di tal manera, mester keda investigá te den profundidat kiko tin di bèrdat.

E rapòrt di e komishon a indiká ku Kontrolaria General lo hasi sierto investigashon abase di algun elemento pa kual ta papia di dje riba Tromp.

Rapòrt di kontrolaria General ta keda publiká dia 31 òktober 2012 riba funshonamentu di Banko Sentral di Kòrsou i St. Maarten. E investigashon di Kontrolaria General (KG) a limitá su mes te na un publikashon di 400 mil dòler ku a bai riba Stichting ET Pensioennen. KG ta indiká ku e no a haña koperashon di Banko sentral den su investigashon. P’esei no por a investigá funshonamentu di banko sentral. Hasta KG ta duda si e loke ku a mustr’e di e fundashon di penshun di Tromp ta basá riba e bèrdat.

Otro notisia ta di un negoshi ku direktor interino di Banko Sentral tin i den kual amiga di Tromp ta traha, a depositá e suma di 400 mil dòler den fundashon di penshun di Tromp. Abase di e notisia aki Fundashon Kòrsou Fuerte i Outónomo a saka un komunikado na 2014 i pa kual Tromp a entamá kaso di rektifikashon di e fundashon. Tromp ta pèrdè e kaso, pero no ta apelá.

Tabatin konsepto di rapòrt di PwC di 4 novèmber 2014 ku título “Investigashon CBCS”. Den e rapòrt aki ta bisa ku no por a investigá integridat di e tòp di banko sentral.

Dia 4 yüli 2016 Tromp ta entrega un rapòrt na prokurador general. For di e aki ya kaba Tromp tabata na altura di investigashon den su kontra. Pasombra el a traha rapòrt abase di notisianan den medionan di komunikashon tokante di kompra di apartamentunan na Miami. A resultá ku a traha e rapòrt pero no a bai den profundo kuné. Esun ku a traha e rapòrt ku ta di PwC a bisa ku simplemente a entrevista Tromp i pone loke Tromp a bisa den e rapòrt. Pero no tin investigashon profundo riba e plakanan di penshun.

Fiskal van der Werff ta konkluí ku tabatin asina tantu señal pa inisiá un investigashon penal i esaki tabata inevitabel. Tromp por a defendé su mes liber di e investigashon. “Pasombra kaminda tin huma no tur ora mester tabatin kandela”.

Bron: Extra

Emsley Tromp por paga loke e debe na belasting “awe” mes

WILLEMSTAD.- Ayera a inisiá e proseso penal kontra di presidente direktor di Banko Sentral di Kòrsou i St. Maarten (BSKS) Emsley Tromp, kende ministerio públiko ta akus’é ku deliberadamente no a hasi menshon na Servisio di belasting di entradanan di su “pensioenopbouw” ku el a risibí durante periodo 2006 te ku 2014. Dor di esaki Kòrsou a pèrdè di gana alrededor di 5.5 mion florin. E kaso tin e nòmber di Saffier.

Promé ku e defensor di Tromp a pidi su deseonan, el a inisiá ku un defensa pa deklará Ministerio Públiko (OM) no atmisibel den su demanda kontra di Tromp.

Mr. van der Laan a indiká ku su kliente for di entrada hudisial ku a tene na su kas aña pasa, ta biba den speransa i miedu. E publisidat di e kaso, a hasi daño inmenso na Tromp.

Mas di 40 aña Tromp ta den servisio públiko i mas di 25 aña komo presidente direktor di Banko Sentral promé di Antia Ulandes i despues di Kòrsou i St. Maarten. Apesar ku e ta hasi su trabou tòg ta bai mete kuné, pasobra tin hende ku no ta kontentu ku su maneho. Un di esnan ku a mete kuné ta eks-promé minister di Kòrsou ku tin un “achtergrond” di korupshon a atake, igualmente ku otro polítikonan.

E no ta un rei òf diktador manera vários media ulandes a pint’e. Van der Laan a bisa di ta trese tur e kosnan aki dilanti pa mira kiko Tromp mester a soportá tur tempu.

Tur e añanan di servisio , i ku Tromp a mantené BSKS riba nivel awor OM ke kore kuné pasobra e lo a kometé froude i perhudiká Kòrsou pa 5.5 mion florin.

For di eksistensia di pais Kòrsou na 2010, e preshon polítiko riba Tromp tabata grandi.

E abogado a sigui bisa ku ta trata di un proseso polítiko kontra di hende ku poseshon haltu.

Mr. van der Laan a bisa ku e tin pleno konfiansa ku korte lo apsolvé su kliente di tur akusashon. Nan ta laga e kaso aki su base di ta un polítiko pa loke e ta. Tambe pa deklará OM no atmisibel.

Enberdat e kaso ta bai pa un diferensia fiskal i interpretashon di esaki. Ta trata di un materia kompliká ku tin hende no por komprondé. Ora ta papia di belasting froude ta bai pa konstrukshonnan fiskal kompliká.

Den dokumentashon dje kaso no tin niun indikashon ku Tromp ke a saka probecho personal di belasting. Nunka a nenga di paga belasting riba su penshun. Hasta el a pensa ku e lo mester paga mas belasting na final di su karera i a konta ku esaki lo ta den kareda di 8 mion, mas di loke OM ta akus’é di dje. “Tromp ta dispuesto na paga awe mes loke e debe na belasting, i e tin sèn pa dek loke e tin di paga”, segun mr. van der Laan.

Bron: Extra

Kaso Tromp no tin nada di aber ku krímen ku ta mina

WILLEMSTAD.- “Nos no ke kompará e kaso di Dos Santos (red: Robby Dos Santos –kaso Bientu) ku esun di Sr. Emsley Tromp, pero Tromp ta e di dos kaso di asuntu di belasting ku ta keda atendé penalmente”, ta loke ku abogado di Sr. Tromp, mr van der Laan a duna di konosé ayera den sala di korte.

Ayera a inisiá e regiezitting di e kaso aki ku tin e nòmber Saffier, kaminda ministerio públiko (OM) ta akusá presidente direktor di banko sentral di a perhudiká Kòrsou ku 5.5 mion florin na froude ku belasting.

Segun mr van der Laan, e kaso aki di Tromp tin di aber ku asuntu di belasting, i mester keda atendé ku kantor di belasting i no di forma penal den korte.

E abogado a bisa ku si sigui kaso di Dos Santos tambe ta unu fiskal. Tromp ta bira e di dos kaso di fiskal/ belasting ku ta keda atendé penalmente. Den e kaso di Tromp ta kua suma mester paga. E kaso di Dos Santos ta kaso di belasting no por atendé nan di forma penal. Pero mester a hasi e kaso penal pasobra ta unu polítiko e ta.

E tim TBO (Team Anti-Korupshon) ku a inisiá e investigashon ta ser finansiá dor di gobièrnu ulandes. TBO ku ta atendé ku kriminalidat ku ta mina, ku ta mishi ku e “boven i onderwereld”. Pero e asuntu fiskal ku OM ta akusá Tromp di dje no tin nada di aber ku krímen ku ta mina. Kisas ta e persona di Tromp, Ulanda ta tras di dje.

E tenshon pa ku Tromp a lanta for di 10-10-10. E komishon di integridat ku a hasi investigashon riba gobièrnu di Schotte a papia di Tromp tambe.

Ta Ulanda ke pa Tromp bandoná e puesto di presidente di banko sentral, segun e abogado.

E investigashon kontra di Tromp ta eksistí for di notisianan di den korant di yüni 2011. Aprel 2016 investigashon ta konkluí ku echo kastigabel ora a tene entrada hudisial den kas di Tromp. A listra den kas di Tromp tantu na Kòrsou komo na Miami. E forma kon e kas na Miami a keda kumpra ta lanta interogatorio segun media. Esaki ta hopi tiki pa por start persekushon penal.

Vários deklarashon den media tabata polítikamente motivá.

E notisianan den media ya pa 5 aña andando, i ta dikon den 2016 ta bai hasi entrada hudisial i persekushon kontra di Tromp.

Den aprel 2016 segun OM awor si tabatin kapasidat pa investigá Tromp. Pero esaki ta pasombra e ora ei Ulanda a pone plaka pa lanta TBO.

TBO a bai atendé asuntu belasting sin sa kon lo tin atendé esaki.

“OM a haña un palu pa bati Tromp kuné”, segun e abogado.

Bron: Extra

Polítika di Ulanda ta tras di Emsley Tromp

WILLEMSTAD.- E kaso Saffier ku ta trata di presidente direktor di Banko Sentral di Kòrsou i St. Maarten sr. Emsley Tromp no ta nada mas ku persekushon polítiko di Ulanda. E kaso ta un agènda polítiko di Ministerio Públiko (OM) ta loke ku defensor di Tromp, mr. van der Laan a trese ayera den sala di korte na inisio dje kaso.

Segun e abogado den forma dudoso a inisiá e investigashon Saffier. No ta pa kasualidat ku tabatin investigashon paralelo ta kanando. Prokurador General (PG) Schraam a pidi minister di finansa di St. Maarten Gibson pa hasi investigashon kontra di Tromp abase di servisio di inteligensia di St. Maarten. PG a pidi Gibson pa keda ketu riba su petishon. PG Schraam ta sa ku e momentu ei tabatin un investigashon penal ta kanando i ku esaki ta bai kana pareu ku e investigashon di Servisio Inteligensia di St. Maarten, i ku lo tin un konklushon final negativo pa Tromp loke a sosodé tambe. Segun resultado di investigashon di Servisio di inteligensia di St. Maarten, OM ta bai den diskushon ki konsekuensia esaki por tin pa posishon di Tromp.

Tambe e abogado a kuestioná ku bosero di OM, Norman Serphos a hasi sierto deklarashon den prensa, miéntras nan no tabatin ningun dokumentashon. A keha e bosero serka su doño di trabou, pero nada a bin afó.

Mr. van der Laan a sigui bisa ku den e akusashon kontra di Tromp, OM no a tene kontakto ku kantor di belasting. Ta trata di un kaso fiskal i tambe kiko ta e “aangifte” korekto ku Tromp mester a duna. Si enrealidat tabatin kuestion di fiskal, mester puntra si ta oportuno pa atendé e kaso.

“No ta Tromp ta perhudiká Kòrsou, pero ta OM”, e abogado a indiká.

E kaso aki no ta pa keda atendé di forma penal, pero unu fiskal.

Tur hende ku ta papia dje kaso ta puntra ta dikon e ta unu penal, si ta algu fiskal e ta.

E maneho di fiskal, belasting ta ser atendé ku sea un but òf “aanslag”. Den e kaso aki no ta papia di eskivá belasting.

E abogado a pidi korte pa deklará OM no atmisibel den e kaso aki. Promé OM mester a atendé ku belasting, i for di resultado di esaki, i ku bon konosementu, si tin algu penal por atendé.

Mr. van der Laan a indiká ku OM ta bisa ku den periodo di 2006 te ku 2016, Tromp a yena belasting no korekto, a yena suma mas abou di loke el a gana. Pero Tromp den su “aangifte” a yena gastunan di estudio di yu, i otro kosnan.

P’esei nan ta bisa ku e dagvaarding no ta duna klaridat di loke ku ta akusá Tromp di dje. Pasombra e pregunta ta kiko Tromp mester a yena na belasting.

Mr. van der Laan a bisa ku nan di defensa ta totalmente sorprendé pa deklarashon di Hof djabièrnè último 21 yüli riba petishon pa deklará e dagvaarding nulo.

Tromp a entrega 4 opinion di ekspertonan fiskal tantu lokal komo un profesor di Ulanda na korte, pero a tene kuenta ku esakinan.

Niun hende ta komprondé e kualifikashon di froude ku OM ta persiguí Tromp di dje.

E pregunta grandi ta ki pregunta ku nan di defensa tin di hasi, kua testigu tin di tende riba e akusashon kontra di Tromp. Esaki ta e preguntanan ku nan ta hasi for di despues di e desishon di Hof di djabièrnè último, segun van der Laan.

Bron: Extra

Tromp a drenta korte via di porta di patras

WILLEMSTAD.- Ayera a surgi vários pregunta ta dikon presidente di Banko Sentral di Korsou i St. Maarten, sr. Emsley Tromp a drenta di porta di patras Palasio di Hustisia , i asina evita di lo keda kapta pa kámaranan di televishon i bista di tur otro hende.

Tur akusado ku ta den libertat i mester presentá na korte ta subi normalmente e 21 trapinan di Palasio di Hustisia pa presentá ante di wes.

EXTRA a haña di komprondé di Hof ku “beveiliging” na palasio di Hustisia a haña petishon di e abogado pa Sr. Tromp drenta di porta patras. E petishon aki no tabata na konosementu di e hues ku ta trata e kaso, ni tampoko direktiva.

“Nos maneho ta ku un persona ku no ta detené ta drenta i sali di porta dilanti, aló ménos si tin un motibu válido pa drenta di patras. Na momentu ku “bestuur” a tuma nota di e situashon, no a konstatá un motibu válido, i a duna instrukshon pa Sr. Tromp drenta i sali for di porta dilanti”, ta loke ku Hof a indiká na EXTRA.

EXTRA mester bisa ku no ta prome biaha ku Tromp ta drenta via porta di patras di Palasio di Hustisia. Siman pasa pa tratamentu di e “dagvaarding” tambe el a drenta i sali di porta patras, loke no ta usual. E splikashon di Hof den e kaso aki ta pa kita tur spekulashon di posibel trato preferensial na presidente direktor di Banko Sentral Emsley Tromp.

Bron: Extra