WILLEMSTAD.- Minister ulandes Ronald Plasterk di Relashonnan di Reino ke nombra un opservadó pa pone òrdu riba asuntunan den e munisipio di Sint Eustatius. Esaki el a bisa ayera den Parlamento ulandes.

Pa basta tempu kaba Plasterk tin preokupashon ku e manera ku ta goberná e isla.

Resientemente Plasterk a duna di konosé ku e no ta permití mas pa e diferente ministerionan ulandes pa tin kontakto direkto ku Sint Eustatius. Ayera Plasterk a bisa ku e presupuestonan di St. Eustatius tin añanan kaba ku nan no ta na òrdu i ku kada bia e mandatarionan lokal no ta kumpli ku e palabrashonnan ku e diferente ministerionan. Asina Ret Karibense ta splika.

Un opservadó asina aworó mester bai mete den e gobernashon diario, pa asina e situashon riba e isla drecha. E simannan binidero tin ámtenar haltu ta reuní ku minister Plasterk pa haña un opservadó adekuá. Ta buska un hende ku hopi eksperensia den gobièrnu, kisas un hende di Ulanda oropeo mes, pa un òf dos aña.

For di parlamento ulandes e minister ta haña sosten amplio pa sigui intervení na Sint Eustatius. ‘Si ta na VVD, por hasi un resèt grandi”, segun e parlamentario André Bosman. Si ta na e parlamentario Roelof van Laar (PvdA) Den Haag mester por aktua direktamente tambe kontra mandatario lokal òf ámtenar lokal ku ta opstruí mandatario ulandes oropeo. Ainda no ta eksistí legislashon p’esaki. Minister Plasterk ayera a primintí parlamento pa investigá e posibilidat aki.

Bron: Extra