WILLEMSTAD.- Den e di dos dia di tratamentu di kaso Maximus, tabata turno pa abogado Marije Vaders hiba defensa pa su kliente Nini Fonseca.

Segun Vaders, Ministerio Públiko a laga buska Elvis Kuwas ku ta esun ku a asesiná Wiels i tambe otro dos víktima mas pa bin testiguá. Vaders a bisa, ku segun Ministerio Públiko, awor si Kuwas lo bin papia e bèrdat mirando ku e tin duele di loke el a hasi, e ke papia e bèrdat pa ku su famia i a kambia su bida. Segun Vaders mirando esaki e tin henteramente otro opinion. Esaki pa motibu ku no ta promé bes Kuwas a testiguá bou di huramentashon, en konekshon ku su kliente.

E abogado a bisa ku e ke kòrda hues ku dia 4 di ougùstùs 2014 Kuwas a hura di deklará e bèrdat, pero djárason ta deklará henteramente otro kos ku el a deklará kasi 3 aña pasa. Segun e abogado, sinembargo e loke ku Kuwas a deklará djárason último no tabata nada nobo. E abogado a sigui bisa, ku es mas, e hues ku Kuwas a hasi deklarashon su dilanti a haña e impreshon ku e loke e akusado tabata konta no ta konfiabel. Esaki a yuda kondusí libertat di su kliente i un otro ko akusado ku tambe a keda sospechá den e asesinato.

E abogado a duna di konos’é ku Kuwas no solamente ta e hòmber di mas peligroso den Reino, pero tambe ta un mentiroso patológiko i ku lokenan el a deklará kontra di su kliente no tin sentido. E abogado a relatá mas aleu ku den promé instansia, Kuwas a ninga di ta esun ku a mata Concepcion, Wiels i Arnaud.

Tambe Kuwas a hasi uzo di su derechi di keda ketu na vários okashon. Segun e abogado Kuwas a presentá sin abogado i a bisa ku e no a traha dil ku niun hende pero solamente ku Dios. Segun e abogado, fiskal a papia ku Kuwas i bis’e ku un kastigu di bida largu ta ward’e. Seguidamente a bin afspraknan entre Kuwas i fiskal riba papel, di kual ámbos a firma esakinan dia 10 di mart 2014 i a kuminsá deklará mesora riba e mesun dia enkuestion. Segun e abogado djárason último Kuwas no a gusta ora el a puntr’e e parti aki, i na e di 3 biaha ku el a ripití di no a firma nada ku Ministerio Públiko, el a kòrd’e riba e akuerdo ku el a firma ku Ministerio Públiko dia 10 di mart 2014.

Segun abogado Vaders, esaki ta un prueba kon a gara Kuwas pa di tantísimo biaha den su gañamentu. Mr Vaders a bisa ku Kuwas a gaña bou di huramentashon i ta pidi hues pa traha un prosèsverbal pa perhurio i ku Kuwas lo wòrdu persiguié pa ku esaki.

Bron: Extra

Nini Fonseca: “Bo no por ta mitar mitar na estado”

WILLEMSTAD.- “Sea bo ta na estado òf bo no ta. Bo no por ta mitar mitar na estado”, ta loke ku Burney “Nini” Fonseca na final di tratamentu dje kaso Magnus a bisa komo su último palabra.

Ayera e defensor di Nini, mr. Marije Vaders a hiba palabra, kaminda el a pidi finalmente pa apsolvé su kliente di tur kulpa.

Nini su último palabra el a lesa for di un karta skirbí. El a bisa ku fiskal ta su héroe, pasombra el a hiba un investigashon hopi largu kontra di dje. Pero awor ta sali na kla ku no tin nada pa bisa di mi envolvimentu den kaso asesinato di Helmin Wiels dia 5 mei 2013.

Nini a sigui bisa ku no tin niun grabashon, no tin nada, e no tin ningun relashon ku e asesino, esnan ku a paga i tampoko ku Wiels. No tin nada di tap, ni tampoko a pone aparato pa skucha kombersashon, tap òf opservashon.

E akusado a sigui bisa ku e ta haña ku ta un lástima ku fiskal ta usa tur sorto di táktika pa ten’e será. Pasombra e sa ku e ta inosente.

“Tur kaso ta bai pa prueba i no redashi òf ken a bisa kiko. Mi no ta kulpabel di e kaso aki. Sea bo ta embarasá òf no. Bo no ta mitar mitar na estado. Ku esaki mi ke mustra ku mi ta inosente”.

Djárason último fiskal a demandá 26 aña di prisòn pa Nini komo kómplise di asesinato di Wiels. E ta ser mira komo esun ku a tuma plaka serka esnan ku a enkarg’é ku e trabou pa likidá Wiels.

Fiskal ta konsiderá Nini komo esun ku ta duna enkargo pa hasi e trabou, i semper e ta keda tras, leu for di e pantaya. Tambe fiskal a konsiderá Nini ku Luigi “Pretu” Florentina (defuntu) komo “makelar di asesino”.

Dia 11 di mei próksimo, wes lo diktá sentensia den oranan di mainta, ora di Kòrsou.

Bron: Extra