WILLEMSTAD.- Na luna di Sèptèmber próksimo, korte lo bai trata dos kaso di asesinato.

Ultimo añanan nos isla a konosé vários kaso di asesinato, di kual vários a keda resolvé, apesar ku tin basta ku sigur no a mira lus den horizonte ainda.
Un di e kasonan ku lo bai keda tratá ta e atrako brutal ku violensia den kas di e komersiante Frank Ignacia (74) ku a pèrdè su bida dia 20 desèmber 2015.
Pa ku esaki 4 ruman; Giovanni, Eddienne, Shurela i Claudio Susanna a keda kondená i pa despues apelá nan sentensia.

Nan a keda akusá di a atraká e víktima i uza violensia kontra dje.

Nan a mara su kabes ku saku di plèstik di kual esaki a pone ku el a asfiksia i muri.
Nan a bai ku un kantidat di plaka i hoya di e víktima i tambe su SUV.

E otro kaso ta e asesinato ku a tuma lugá dia 5 di febrüari último den un kas na Penstraat, kaminda e konosido Gerald Nicolina alias Chado di 39 aña a keda asesiná.
E víktima a pèrdè su bida den su kas riba su kama, momento ku dos hòmber a drenta bai te den kamber i tir’é mata.

Pa ku esaki e sospechosonan R. Roozendaal (68), M. Valdez (21) di Rep. Dominicana, S. Martina (26) i S. Castillo (36) ta keda akusá di ta esnan responsabel pa e asesinato.

Tambe nan ta keda akusá pa posishon di arma di kandela.
Segun fiskal, Castillo ta esun ku lo mester a plania kon tur kos mester a bai.
E akusado mayor di edat Roozendal ta keda sospechá di a duna “órden” pa asesiná Nicolina.

Despues di a kometé e krímen, e dos asesinonan a move bai for di e sitio den un outo, ku djis despues a bin resultá kimá den e área di Coronet.

Ainda tin vários kaso grandi mas di asesinato manera entre otro The Alley, Campo Alegre, Kaya Hematita i e asesinato riba e komersiante chines na Janwe ku tin ku keda trata den korte e aña aki.

Den mesun rosea, tin basta otro kaso mas ku ainda komunidat ta pendiente pa keda resolvé pero ku praktikamente polisnan no tin masha pista di nan.

Kuerpo polisial a duna di konosé ku tur kaso pa nan ta importante i ku tur dia di nobo nan ta trahando riba nan pa ser resolvé.

Bron: Extra