Extra | VBC: Kòrsou ta pagando karu pa e instabilidat polítiko

VBC ta konkluí: E poblashon trahadó ta enpobresiendo

WILLEMSTAD.- Ta kon e mundu polítiko por kere ku por papia di stabilidat polítiko ni di gobernashon si mester analisá e situashon for di momentu ku Kòrsou a haña su status outónomo den Reino.

Asina VBC ta bisa den un komentario dje luna aki. Den su análisis e organisashon di komersio ta bisa ku dia 23 di desèmber 2016 e koalishon di gabinete Koeiman a sinta konsistiendo di e partidonan MAN, PAR, PS i PNP. Ya pa dia 12 di febrüari 2017 Minister Presidente a entrega retiro di su gabinete pa motibu ku el a pèrdè sosten di mayoria den Parlamento. Den e kaso aki Pueblo Soberano a kita nan sosten.

VBC ta sigui bisa ku na 10-10-10 Kòrsou a haña e status di pais outónomo den Reino Ulandes. Den e periodo di 10-10-10 pa 12 di febrüari 2017 tabatin 7 gabinete (Schotte, Betrian, Hodge, Asjes, Whiteman-I i II) a goberná Kòrsou i mas ku 45 diferente minister. Esaki ta trese nos na un promedio di un gobièrnu pa aña.

Teniendo kuenta ku e situashon aki, lo por papia di stabilidat polítiko i/òf den gobernashon i konfiansa den polítika? A base dje resultadonan di un investigashon ku CBS a hasi, e kontesta riba e parti di konfiansa tabata ‘no’. E parti den kual tin ménos konfiansa ta partidonan polítiko (2.3%), gobièrnu (3.8%) i Parlamento (4.1%). E resultadonan preokupante aki opviamente no ta motibu pa polítikonan i nan partidonan rekonosé ku nan ta fayando i bini ku mehorashon pa hisa e konfiansa i stabilidat. Al kontrali, e krísis polítiko di mas resien ta indiká ku ta trata di tur manera i ku arogansia pa yega na poder polítiko i konsolidá esaki. Ku e manera super egoista aki sin mas tin konsekuensianan negativo.

I riba tereno sosial ekonómiko esaki ta tradusí su mes den sifranan malu e.o. riba tereno laboral, unda tin un nivel di desempleo basta alarmante. Desempleo en general ta di 13.3% i bou di hubentut 36.8%.

Den e periodo di 2010-2016 por papia di un kontrakshon anual promedio di 0.2%. Komunidat di Kòrsou ta pagando un preis muchu haltu pa e instabilidat polítiko i falta di konfiansa. Por papia tambe di un oumento den pobresa, ku ta tradusí su mes no solamente den pèrdida di trabou i entrada pero tambe un bahada den e nivel di enseñansa, salubridat, seguridat, pues un pèrdida den bienestar i prosperidat.

Bron: Extra

VBC ta konkluí: E poblashon trahadó ta enpobresiendo

VBC ta konkluí: E poblashon trahadó ta enpobresiendo

WILLEMSTAD.- T’asina ku den e periodo di sèptèmber pa òktober 2016 CBS a tene un investigashon bou di e forsa laboral aki na Kòrsou ku e meta pa midi e último desaroyonan riba merkado laboral di Kòrsou.

A trata aki di e tendensianan ku tin den aktividatnan di empleo manera e.o. e partisipashon, kantidat di trahadó i e grupo ku ta buskando trabou i e porsentahe di desempleo. VBC den su reakshon dje luna aki ta bisa ku, e resultadonan di e investigashon a keda publiká resientemente i ta mustra entre otro ku:

Kompará ku 2015, por mira un oumento den e porsentahe di desempleo di 11.7% pa 13.3%. Kompará ku 2015 tin un oumento den e porsentahe di desempleo bou di hubentut, di 29.7% pa 38.6%. Kompará ku 2015 tin un oumento (1.755 persona mas) di desempleo bou di e poblashon en general di 8.195 pa 9.953 hende. Kompará ku 2015 e poblashon ku tin trabou tambe a oumentá ku 3.294 te na 65.117. Kompará ku 2015 tabatin un oumento den e grado di partisipashon, kual a subi di 45.1% pa 47.9%.
Kompará ku aña 2015 tin un oumento di 5.049 persona den e poblashon profeshonal ku ta subi di 70.02 pa 75.070 hende.
TENDENSIA

Tin algun tendensia. E poblashon mes, e parti profeshonal, e kantidat di hendenan ku ta traha komo esnan ku ta buskando trabou ta subiendo. Pero e kresementu ekonómiko no ta sufisiente pa krea mas empleo, i esaki ta pone ku e sifra di desempleo ta keda relativamente haltu, i asta tin un tendensia di subi atrobe. E desempleo bou di hubentut a empeorá aun mas. Tin mas tantu hende muhé ta traha kompará ku hende hòmber. Por sierto, e kantidat di hende muhé ku ta buskando trabou tambe ta mas tantu ku hende hòmber.

E sektornan ku tin e gastunan salarial di mas abou tin mas tantu kupo di trabou. Di e poblashon ku ta traha, e kantidat di hende den servisio fiho ta mas tantu, pero e kresementu ta stagná. E subida grandi den empleo ta den e posishonnan fleksibel, manera e.o. trahadónan temporal òf part-timers.
E promedio di entrada pa kabes ta bahando, pues por papia di un empobresimentu i un retraso den prosperidat.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *