WILLEMSTAD.- Pa vários luna kaba e departamento anti narkótika di ehérsito venezolano tabata sigui un grupo di trafikante.

Informashonnan ku EXTRA ta dispone ta indiká ku durante di un patruya rutinario di Wardakosta di Punto Fijo, esaki a detektá un GoFast ku a kue rumbo pa e islanan ulandes i a sigui e boto via di radar.

Aparentemente e GoFast a sinti presensia di e Wardakosta di Kòrsou, pasobra direpente nan a bira bèk.

Nan a disidí di regresá den awanan teritorial venezolano.

Wardakosta venezolano sinembargo a pidi apoyo di Guardia Nashonal Bolivariano ku a sigui e GoFast for di kosta.

No a dura hopi ku Wardakosta a logra changa e Go Fast. A arestá e tripulashon i konfiská 365 kilo di kokaina ku tabata skondí den 9 bulto. Ademas a haña algun arma i munishon.

Nos fuentenan a indiká ku segun Wardakosta venezolano e kargamentu tabata pa Kòrsou, esaki basá riba datonan ku nan a haña den e boto i for di e tripulashon.

Bron: Extra