WILLEMSTAD. – Manera ta konosí dia 29 di sèptèmber tras di lomba Hues Komisario a trata e petishon di dos sospechoso den e kaso asesinato Helmin Wiels, investigashon ku a haña e nòmber “Maximus”, den e kaso aki Elmer “Kadè” Wilsoe i George Jamaloodin.
Wilsoe tabata eks Gezaghebber i eks Minister di Hustisia, miéntras ku Jamaloodin tabata eks Minister di Finansa.
Mester indiká ku kada sospechoso a entamá nan petishon konforme artíkulo 56 insiso 3 di Kódigo di Prosedura Penal separá. Kasonan no a keda tratá huntu i kada un di e sospechosonan a haña un veredikto riba nan mes.
E petishon simpel bisá ta pa Hues Komisario tuma un desishon obligando Ministerio Públiko para e investigashon Maximus kontra di e dos personanan ariba menshoná òf stipulá un fecha pa finalisá e investigashon.
Hues den su desishon a duna di konosé ku e no por honra e petishonnan di dos sospechosonan aki, pa motibu ku e ta di opinion ku e investigashon no ta durando largu, basá riba e peso di e investigashon, miéntras e investigashon konosé avansenan signifikante.
Hues Komisario no a konstatá ku tin un tardansa innesesario den e investigashon òf ku Ministerio Públiko ta wanta informashon atras.
Tin hopi kos ku e investigashon aki tin di tene kuenta kuné, esta ku aspektonan internashonal, manera investigashon riba otro teritorionan riba tereno finansiero.
Esaki ta trese kuné ku tur kos huntu, no por papia di un tardansa sin nodi.
Di e forma aki Hues Komisario no a honra e petishonnan hasí.
FIN DI INVESTIGASHON MAXIMUS NO TA RIBA HORIZONTE
E loke ku Ministerio Públiko a trese dilanti durante e tratamentu di petishon konforme artíkulo 56, ta ku e investigashon Maximus ta leu for di horizonte. Pues no tin un bista ki dia e investigashon aki ta kla.
For di despues di morto di Wiels e tim “Grootschalig Opsporing” ta trahando inkansabel pa solushoná e kaso aki.
Banda di esei e tim a usa métodonan bou di e lei di BOB, ku ta Bijzonder Opsporings Bevoegdheid”. Esaki ta un lei ku ta fasilitá Ministerio Públiko den su afan pa yega na e bèrdat.
Fiskal a trese dilanti ku ta trata di un investigashon kompliká, sigur si tuma na konsiderashon ku Kòrsou ta un isla chikí i tur hende konosé otro.
Esaki ta nifiká ku e investigashon ta leu for di bista i Hues Komisario a pone mas balor na e desaroyo di investigashon ku e aspektonan personal di sospechosonan.
Bron: Extra