WILLEMSTAD.- ‘Mi no tin miedu di niun hende. Ministerio Públiko no ta spanta mi. Fiskal Rip no ta intimidá mi. E no por kibra mi tampoko. Pasobra mi tin un karakter sumamente fuerte.”

Asina parlamentario i eks minister di Hustisia Elmer Wilsoe a splika ayera den un rueda di prensa ku el a organisá pa reakshoná riba e notisia ku Wilsoe ta sospechoso den e investigashon di RST di hende responsabel pa asesinato di Helmin Wiels. ‘Ami a kere semper ku mi a biba den un estado di derecho. Nunka den un estado di redu. Trabou di Ministerio Públiko ta pa protehá nos tur kontra siudadanonan ku no ta kumpli ku lei. Nan guia ta, loke nan ta yama “waarheidsbevinding”, buska e bèrdat te kaminda e yega bo. Den mi kaso mi ta papia di ‘waarheidsfabricatie.’

Wilsoe ta sospechoso pa mas ku dos aña, pero na su opinion nunka tabatin niun prueba. P’esei Wilsoe ta bisa ku Ministerio Públiko den su kaso no a buska bèrdat, pero redu. ‘Ministerio Públiko aparentemente tin komo lema ku ‘het doel heiligt de middelen’. Anto esaki no ta kuadra den nos estado di derecho. Ku ta konta pa tur siudadano ta igual. Tambe pa Ministerio Públiko.”

Wilsoe tambe a splika ku den febrüari e aña aki fiskal Rip a invitá Wilsoe pa un kombersashon informal. Durante e kombersashon Rip a puntra Wilsoe si durante dia 5 di mei di 2013, dia ku a asesiná Helmin Wiels riba playa di Marie Pampun, Wilsoe a papia ku hende tokante su afsprak ku Wiels. Rip a puntra Wilsoe si el a bisa otro hende ku Wilsoe tabatin un afsprak pa topa ku Wiels na Marie Pampun riba e dia fatal. Wilsoe a splika ku el a papia ku niun hende. Rip a puntra Wilsoe pa pensa riba su kontesta un bia mas.

Wilsoe a respondé: ‘Awe, mañan i den 10 aña mi lo deklará mesun kos.”

Bron: Extra