WILLEMSTAD.- Turismo di kompra, pa ta mas eksakto e aktividatnan den Zona Liber ta den un fase di transishon, den e sentido ku kumpra tradishonal a opta pa bai otro merkadonan.

Pero gobièrnu di Kòrsou ta hasiendo su esfuersonan pa kambia e desaroyo aki. Esei EXTRA por a komprondé di Minister di Desaroyo Ekonómiko, sr. Eugene Rhuggenaath. T’asina ku hopi di esnan ku tabata kumpra aki den nos zona liber ta optando pa otro destinashonnan.

Segun e mandatario, e problema ta ku último añanan hopi di esnan ku ta hasi negoshi den zona liber a bin ta kambia e balor agregá ku e sentro di kompra i benta aki tin. Manera por rekordá kon a monta akshonnan pa deshasí di produktonan imitá.

Aparte di esei tabata bendiendo produktonan di ménos kalidat ku no tabata kompetitivo pa zona liber. Esaki tabata un dje motibunan ku e kumpradónan a disidí di migra pa otro merkadonan. Es mas, den kombersashon ku Frezacur por mira ku mas i mas di nan miembronan ta bendiendo produktonan via di Internet. Esei ta trese kuné ku bo no ta mira tantu kumpradó mas. Nan ta kumpra i ta solamente e kompania lokal tin di barka nan merkansia pa e destinashonnan korespondiente.

E situashon aki a bin ta hasi impakto riba e aktividatnan di benta por mayor i zona liber riba su mes. Esei a pone ku Curinde a bin a kambia su ròl tambe un tiki. En bes di ta enkargá eksklusivamente ku maneho di su propiedatnan, e ta okupando su mes mas komo desaroyadó di e zona dor di hasi merkadeo ‘online’.

Den kuadro di esei ta bai lansa aworakí un bentana di kompra kaminda klientenan por kumpra kos ‘online’. Pues no opstante ku e bishitantenan no ta visibel den zona liber, e sentro aki no ta pèrdè benta. Banda di esei ta hasiendo esfuerso tambe pa atraé produktonan di marka di kalidat. Asina pues lo por promové Kòrsou mas bien komo un showcase di produktonan di renombre. Antisipando riba esei lo bai na konstruí un showroom, ku e meta pa usa Kòrsou komo un sorto di trampolin pa produktonan di kalidat.

Bron: Extra