FINALMENTE DARWIN GREGG A SALI PA VENEZUELA PA TRATAMENTU MEDIKO

….riba e foto momentu ku Darwin Gregg den kompania di su famia ta na Airopuerto pa sali pa eksterior….

FINALMENTE DARWIN GREGG A SALI PA VENEZUELA PA TRATAMENTU MEDIKO

WILLEMSTAD.- Finalmente e konosido Darwin Gregg kende a bira víktima di un atrako brutal den fin di siman pasá, ayera nochi a subi avion i sali pa Venezuela, kaminda lo e risibí tratamentu médiko adekuá p’e múltiple leshonnan ku el a sufri.

E direktor di Radio Krioyo a sufri te hasta kemaduranan di terser grado sumamente grave, despues ku e kriminalnan a kim’é ku heru di strika kayente i tambe a praktiká otro tipo di abusu físiko manera skòpmentu i gòlpinan fuerte. Despues ku ekspertonan médiko a urgi entre otro via dje medio aki pa e alabes músiko kantante risibí tratamentu adekuá i si por mihó na Venezuela kaminda tin mas speshalisashon p’e tipo di kimánan aki, e biahe pa pais di Simon Bolivar a kristalisá.

No opstante sintá den un ròlstul i destrosá p’e atake maligno i kruel, e víktima tabata mustra basta fuerte ku konfiansa di lo bolbe Kòrsou tankatan manera e mes a bisa, pa sigui sirbi e pueblo ku su diferente aktividatnan. Pero artista Gregg no solamente a keda malamente torturá ku heru di strika kayente sufriendo kemaduranan di terser grado na diferente parti di su kurpa, pero ademas el a risibí kimánan di segundo grado.

Huntu ku esaki hopi sla na diferente parti di su kurpa, dor di kual opviamente lo tabata mas mihó si fo’i despues dje suseso el a keda interná den un instituto di kuido médiko manera Sint Elisabeth Hospitaal (SEHOS). Sinembargo su ruman spiritual abogado Marius Römer a bisa EXTRA ku e no tabata ke keda den hòspital, pero ku tabata trahando riba un posibel biahe pa Venezuela, ku ayera nochi a tuma lugá manera mas promé indiká.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *