Uw ingezonden brief in de Knipselkrant Curacao? Stuur uw brief voor 17:00 uur naar emailadres: INGEZONDEN. Wij publiceren uw brief zonder deze in te korten. De redactie van de Knipselkrant Curacao is niet verantwoordelijk voor de inhoud. Ingezonden stukken die beledigende of discriminerende taal bevatten worden door ons niet gepubliceerd.
Vandaag laten we Maria Liberia Peters aan het woord
KU ATENSHON nos a skucha Dr. Emsley Tromp refutando i argumentando tur e diferente atakenan kontra di su persona.
Forsa di un nashon hóben ta den preparashon i partisipashon di su rekurso humano. Kaminda apénas 60 aña pasa nos a konosé na kabes di nos institushonnan klave profeshonalnan ku no tabatin rais den e tera aki, poko poko sigun nos hóbennan a haña oportunidat di bai studia e panorama a bin ta kambiando.
Kòrsou a bin ta konosé diferente yunan di tera bon eduká ta bin pais bek pa okupá puestonan klave i kontribuí na desaroyo di nos pais Kòrsou.
Semper den mi époka komo mandatario nos a konsiderá Banko Sentral un di e institutonan di mas krusial pa garantisá un maneho finansiero-monetario stabil di Kòrsou.
Tumando na konsiderashon pa anos largu industria finansiero tabata un di e pilanan importante pa entrada di nos pais i pa sosten di desaroyo ekonómiko nos a kuida e instituto Banko Sentral manera ta kuida un Kampion Olímpiko, alimentand’e ku sosten di maneho.
Pa motibu di nos industria finansiero, Kòrsou su nòmber i imágen a penetrá den tur skina di mundu.
Motibu dikon ántes komo Promé Minister di pais Antia, huntu ku Ministernan di Finansa i Ekonomia tabata deliberá regularmente riba desaroyo i pasonan tantu lokal komo internashonal.
Mi ta puntra kiko 10-10-‘10 a nifiká pa nos den práktika. Riba papel por tin palabranan fórmula den konstitushon i tur sorto di reglamento, pero ta e forma ku ta duna kontenido ta konta.
Kon por ta posibel ku ya ta mas ku 5 aña, despues di 10-10-‘10 ku Gobièrnunan a demonstrá di no ta kapas di nombra un ekipo konsistiendo di personanan serio i di nivel pa funshoná komo Kuerpo di Supervishon di Banko Sentral.
Por ta pa motibu di astusia pa asina spera ku por haña kalke slep di parti di gerensia i asina haña un èksküs pa ‘Quitate tu para poner me yo’?
Kuantu importansia Ministerio di Finansa ta duna na imágen di un instituto asina importante manera un Banko Sentral di un Pais, ku tin industria finansiero komo un pila importante. Nos ta sera diferente tratado finansiero rònt mundu.
E forma ku nos Gobièrnu ta permití pa sierto forsanan hunga ku imágen di nos pais, lo mester duna di pensa riba plataformanan internashonal.
Minister Plasterk na un manera hopi sabio i korekto no a pèrdè pa gana i posishoná su mes. El a duna di konosé den prensa ku opinion di Financieel Dagblad no ta opinion di Gobièrnu Ulandes.
E pueblo lo a ferwagt di tende di parti di su mandatario(nan) lokal serio kon nan ta posishoná nan mes pa ku un instituto asina importante manera nos Banko Sentral.
Ya no ta un asuntu di persona Dr. Emsley Tromp. Ta un asuntu kon un Pais Outonomo ta atendé internamente su asuntunan importante. Estatutonan di Banko Sentral ta stipulá ku Kuerpo di Supervishon ta konsistí di 5 miembro. 2 di Kòrsou, 2 di St. Maarten i huntu ta disidí riba e di 5 kandidato. Konseho di Supervishon aktual ta konsistí di 1 miembro apuntá dor di St. Maarten, 1 apuntá dor di Korte di Hustisia i un apuntá dor di Gobièrnu di Kòrsou. Pa kolmo esun di Kòrsou ta un ex-politiko di un partido Ulandes Europeo.
Mi ta di opinion ku Minister di Finansa, mester demonstrá postura i eksigí pa distinguí lo personal for di asuntunan al kaso i real i mustra ku berdaderamente nos ta digno di Goberná Pais Kòrsou Outonomo den Reino.
MARIA LIBERIA-PETERS
(Eks-Promé Minister di Antia)