Ingezonden: Preokupashon

Lezers Schrijven

Uw ingezonden brief in de Knipselkrant Curaçao?
Stuur uw brief voor 17:00 uur naar emailadres: [email protected]

Wij publiceren uw brief zonder deze in te korten.
De redactie van de Knipselkrant Curaçao is niet verantwoordelijk voor de inhoud.
Ingezonden stukken die beledigende of discrimeneerende taal inhouden worden door ons niet gepubliseerd.

Vandaag laten we IDO STEEN aan het woord…………..

MI A lanta komo mucha den bario di Mundo Nobo i Charo, a ser eduká ku masha disiplina pa mi mayornan i demas familiares ku un bista skèrpi riba e meta ku mi tin di alkansá mi dilanti. Semper studia, komportá mi mes na un manera desente i laga kara di mi mayornan lusi ku mi produkshon.
Awe ku mi ta un adulto senior mi por wak patras i ku hopi orguyo por bisa ku danki na Dios i na e edukashon ku mi a haña di mi mayornan, mi a logra mi meta.
Ku tabata fasil?
No, ningun manera, al kontrario, ku e tiki rekursonan ku tabata disponibel e tempu ei, kompara ku awor aki, nos tur di e generashon ei mester a hasi hopi esfuerso pa por a alkansa nos soño, nos meta.
Un di e pilarnan ku a kontribuí en grande na mi formashon, tabata i ta te ahinda mi formashon spiritual, mi lès di katisashi, mi misa katóliko.
For di mi siñansa básiko mi ta korda kon pastor en felis memoria Ellis tabata bishita skol i duna les di katisachi.
Riba tur prome djabierne di luna tur skol básiko di parokia tabata reuni mainta 9’or pa un misa solèm na misa di La Birgen di Coromoto, despues den rij nos tur tabata kana kompañá pa nos maestro pa bai skol bèk. Tabata reina un disiplina, un rèspèt.
Anto djadumingu bo presensia na misa mester ta visibel pa un i tur.
Sigun añanan ta pasa i bo ta krese bo ta asistí na misa di 7’or di anochi, na lof.
Ningun hende tabatin berguensa falsu, tin hóbennan ku hasta tabata kompeti pa bira sirbidó di un di e misanan.
E tempu ei tabata masha normal ku misa tabatatin su propio koor y sigur 6 pa 7 sirbidó di misa. Temporada di risibimentu no ta kos di papia mes.
No.., sin gaña nos hóbennan di e tempu ei (mayoria anto) tabata angel di señor.
Tur hende ta slag pa nan Mulodiploma, esnan ku kier i por manera ami, por a sigui skol avansá, otronan a solisitá y haña trabou den komunidat ku fasilidat.
Bida tabata duru pero bunita, simpel ku rèspèt, dignidat i trankil.
Awor mi ta preokupa, preokupa pasombra ya mayoria tópiko ku mi a deskribí mas den kuminsamentu no ta alkansabel òf aplikabel mas.
Hende a kambia, kambia pa malu, pa peor di tur loke bo por imaginabo.
Awe no tin les di katisachi mas na skol, no tin pastor ku ta dispuesto pa sakrifiká nan mes pa hiba nan parokia dilanti.
No tin servisio di konfeshon.
Ki ora ku bo kier misa ta será den siman.
I si tin misa mes ta dos pipita di hende semper mi ta konta i tur ta hende grandi, ningun hoben. Mi sa di barionan ku no tin misa mas den siman.
Kada bes bo ta tende no tin pastor, pastor a bai den exterior, pastor ta malu, no tin pastor masha ten den e bario aki.
Un berguensa, un chaos, un gran parti di poblashon ta lanta sin formashon religioso.
Pues dimes ku tur ensenansa ta frágil, pasombra e fundeshi spiritual no tei. Asina e hoben moderno ta krese sin respet pa otro.
Ta mata otro manera ta sangura ta mata, tira atrako, horta et cetera i kada bes mas severo i brutal. Si…., na boka grandi mi ta laga mi vos resoná i protestá, mi ta preokupá, hopi preokupá.
Tin hopi, masha hopi hende ku indudablemente ta di akuerdo kumi, pero dor di e berguensa falsu of kultura di miedo no ta bini dilanti pa deklará tal kos.
Si nos poblashon no para ketu na e chaos aki i buska solushon rápido, mi ta teme di mira un futuro hopi skur pa e hobennan ku ta lantando.
Unda mi generashon a keda ku edukashon di nos yunan?
Mayornan no tin tempu i no ta dispuesto pa hasi sakrifisio pa inverti den edukashon di nan yunan. Anto aki mi no ta referí solamente na religion katóliko, sino tur religion.
Mi no kier pa papa Dios rabia!
I mi ta sigui resa: Nos Tata ………ma libra nos di malu. Amen.

IDO STEEN

Geef een reactie

Het e-mailadres wordt niet gepubliceerd. Vereiste velden zijn gemarkeerd met *