Ingezonden: Un tiki preokupá.

Lezers Schrijven

Uw ingezonden brief in de Knipselkrant Curaçao?
Stuur uw brief voor 17:00 uur naar emailadres: INGEZONDEN

Wij publiceren uw brief zonder deze in te korten.
De redactie van de Knipselkrant Curaçao is niet verantwoordelijk voor de inhoud.
Ingezonden stukken die beledigende of discrimeneerende taal inhouden worden door ons niet gepubliceerd.

Vandaag klom ” Felix D. Pinedo ” voor ons in de pen…………..

Awor aki ta 4’or di marduga diarason 18 di december. Mi a spièrta sierto momentu i no por a pega soño mas. Mi ta keda hopi al tanto di desaroyonan den nos komunidat i ta reakshoná konstantemente na mi opinion di un manera bastante rashonal ku diferente komunikadonan den medionan di komunikashon. Awe den e oranan tempran di mainta na momentu ku hopi ta lanta pa bai misa di aurora, e desaroyonan rondo di e hòspital nobo a keda pasa den mi kabes. Mi a disidi di warda te despues di mayan ku Dios ke (diaweps 19 di December 2013), e fecha ku mi ta denominá komo e ‘point of no return’, pa mi sigui duna mi pensamentunan rondo di desaroyonan entorno konstrukshon di e hòspital. M a disidi di skibi awor aki sí riba e otro punto ku a tene lantá awe mainta tempran. Esaki ta e manera ku den komunidat ta atende ku hinter e asuntu rondo di nos minister plenipotensiario. Mi a mail e komunikado aki mes mainta 5’or pa medionan di komunikashon. Awor ku a atende e asuntu aki den parlamento i ku kabes di ningun hende a kai, manera ku tabatin hendenan tabata ke, ‘let’s go back to business’. Si tabatin fayonan e señora lo mester a siña su lès entre tantu. E no ta e prome individuó den e komunidat aki ku por a komete algu robes den un funkshon sea privá, komo amtenar òf politiko. No tin nodi di menshoná e kasonan aki. Ban laga e señora sigui ku su trabounan na bienestar di nos país i e yiunan di tera aya na Hulanda. Mi ta kere aden ku un hende tin karakterístikanan bon den dje i mester tin e oportunidat pa un ‘second chance’ i hasta un di tres chèns. Esaki ta algu ku a tuma luga na diferente okashon den nos komunidat. Laga nos no sigui sostene posishon di periodistanan i polítikonan Hulandes ku ta periguí nos minister plenipotensiario ku alma i kurpa. Na Hulanda tin sufisiente kasonan ku no por mira lus di día pa nan investigá i duna nan komentario ariba. Mi ta un hende ku ta wak e kanalnan di televishon Hulandes tur dia i ta keda al tanto di loke ta pasa aya. Por skibi buki di kasonan por ehempel froudulento i di tur sorto di índole ku ta tuma luga riba tur sorto di tereno manera por ehempel dor polítikonan, medikonan, ministernan, profesornan, huristanan, huesnan, bankonan i tambe den area di konstrukshon. Pues bastante kosnan hopi pisá for di slá ku e periodistanan i polítikonan Hulandes por tene nan mes ‘bezig’ ku ne. Si periodistanan i poltíkonan Hulandes ta persiguí nos hendenan aki asina pisá nos periodistanan i polítikonan tin mes derecho pa den nos parlamento i den medionan di prensa na Hulanda mustra riba e asuntunan for di sla ku ta sosode na Hulanda. Ami no ta bai kulpa nos minister plenipotensiario di nada pero sí ta bisa ‘een gewaarschuwd man telt voor twee en een gewaarschuwd vrouw telt voor drie’. Si tin algu ku a bai robes, un diskulpa di bo banda lo ta na su lugá. Pues sa ku wowonan ta riba bo i sigui hasi bo trabou na bienestar di país i nos hendenan na Hulanda ku tin hopi mester di bo atenshon.

Felix D. Pinedo

Advertentie

To Top

Geef een reactie

Het e-mailadres wordt niet gepubliceerd. Vereiste velden zijn gemarkeerd met *