Kampaña, ekonomia i eskoho

KAMPAÑA PA e elekshon na òktober 2012 a ranka sali pa algun partido i diskushonnan a lanta kabes mesora riba e tipo di kampaña ku e diferente partidonan ta hiba. Sinembargo, e tipo di diskushonnan aki no ta nobo i lo no stòp di surgi miéntras tantu nos no para ketu i komprondé e lokual nos ta mira pasa ya pa tradishon. Kampaña polítiko no ta nada mas ku un eskoho stratégiko di kada partido polítiko pa hiba na mensahe na e komunidat i konvensé esaki pa vota pa nan partido i esnan riba e lista di e partido. Kampaña polítiko pa elekshon ta bon pa Kòrsou, partikularmente ekonomia di Kòrsou. Maske nunka a laga hasi investigashon di e impakto ekonómiko i ta difísil pa haña e informashon ei, nos sa algun kos: E organisashon di elekshon di parti di gobièrnu ta kosta alrededor di 1 mion florin (stembiljet, mashin, material i kolaboradornan urna, èts.). Ta bisto ku hopi sèn ta ser hinka den media (radio, televishon, korant, internet, telekomunikashon èts.), pa pasa propaganda. Hopi di e propagandanan ei ta ser traha pa kompania òf personanan ku ta dominá e arte di diseño, aktuashon, produkshon di video èts. ku no nesesariamente ta mará na un media. Hasiendo esaki nan ta haña un entrada, ku di otro manera, sin elekshon, lo no ta e kaso. Material di propaganda tambe ta un fuente ekonómiko grandi durante kampaña. Hopi kompania di imprenta i importadó ta envolví den t-shùrt, bandera, pèchi, flyer, poster, billboard, èts. ku no ta liber di derechi di importashon i OB. Bandanan musikal i artistanan tambe ta haña un pida dje bolo. Esaki ta nifiká entrada pa músikonan i doñonan di banda. Hürdónan di lokalidat pa sedenan adishonal di partidonan polítiko tampoko mester keda ekskluí, meskos ku ta e kaso ku oumento di uzo di kombustibel pa kore bario òf repartí material di kampaña. Tampoko mester lubidá partimentu di sakunan di kuminda, frishidèr, blackberry i otro produktonan, ni e kantidat di obranan karikativo manera fèrfmentu di kasnan di ansiano, limpiesa di tereno i yudansa pa esnan di ménos rekurso, èts. Ku otro palabra, un kampaña tin impakto ekonómiko faborabel pa Kòrsou. Ami ta kalkulá ku alrededor di 10 pa 15 mion ta lora durante e 9 simannan di kampaña benidero. Na mes momentu, e uzo di media, bandanan musikal, èts. su úniko meta ta pa haña bo voto. Bo voto sinembargo, ta un eskoho liber i sekreto. Esaki ta e úniko splikashon dikon algun partido ta invertí míles sino miónes den kampaña pa haña djis algun voto miéntras otronan ta hinka algun mil florin so i logra saka asiento. Finalmente e eskoho di e votadó no ta basá riba e kantidat di plaka hinka den kampaña ni den e kantidat di tempu (tin partido ta hasi kampaña henter aña). Mas bien ta e lokual ku e partido demostrá ku e tin aden ta pisa ora e votadó ta hasi su eskoho. Wak rondó di bo i realisá ku e kayanan ku bo ta kore ariba, e kasnan di gobièrnu den mayoria bario, e lusnan di kaya, e telefòn na bo kas i esun den bo man, e servisionan médiko, sosial, ekonómiko i servisionan di gobièrnu, e skolnan, universidat(nan), e penshun ku bo ta kobra fin di luna i tur e lokualnan ku ta hasi nos diferente for di mayoria isla den e region aki, tur tin mas ku 18 i sigur mas ku 2 aña. Kon por ta ku mester di asina tantu invershon ainda pa influensha bo eskoho?

ALVIN M. DAAL
Curaçao

Geef een reactie

Het e-mailadres wordt niet gepubliceerd. Vereiste velden zijn gemarkeerd met *