ORANJESTAD – “Nos a cuminza un investigation tambe na e supuesto maltrato di menornan den Aruba Boot Camp” vocero di ministerio publico, Ann Angela a confirma na NoticiaCla diamars anochi. Segun Angela, tabatin denuncia haci, y a actua riba esakinan. Manera ta conoci pa varios dia/siman e asunto di boot camp ta den noticia. Kehonan, reclamo y pregunta ta topico di dia y awor e caso a bira mas serio.
TRAHA HUNTO
Segun Angela, ta normal cu OM ta traha hunto cu KPA y voogdijraad den e casonan aki. Den e caso specifico aki, ta trata di dos diferente denuncia haci, durante dos diferente periodo. E prome ta na februari ultimo y despues uno na maart. Ambos ta contra e lidernan di e booth camp, debi na supuesto ‘maltrato di hobennan’. E investigacion mientrastanto ta andando, y tanto polis di San Nicolas como Jeugd en Zeden Politie ta trahando hunto pa resolve e asunto aki.
KEHA BOOTH CAMP
Tambe ta conoci cu e dianan aki tanto esnan cu ta keha e camp aki tabata den publicidad y a bin dilanti pa splica nan situacion. Mes momento esnan cu ta wordo keha, e doñonan di e camp a bin dilanti den un intento pa desbarata tur acusacion cu tin contra nan. A bisa tambe na e occasion ey cu nan ta na altura di e acusacionnan y cu e caso ta den man di abogado, cu lo sa con pa maneha e situacion aki.
ARUBA BOOTH CAMP
Ta trata di un booth camp unda un grupo di entre 10 pa 20 hoben cu tin problema di comportacion, ta pasa un periodo di 7 luna pa siña disciplina for di esnan cu ta maneha e camp. Pero na caminda cosnan a bay robez ora cu por lo menos un di esnan encarga, a bula afo y cuminsa papia riba e situacion. Despues ultimo cos lo a empeora ora cu te hasta 8 hoben a huy for di e centro, y bolbe nan cas finalmente.
Bron: Notisiacla