NoticiaCla | Aruba y Corsou tambe implica den e scandal ‘Panama Papers’

Aruba y Corsou tambe implica den e scandal 'Panama Papers'

Aruba y Corsou tambe implica den e scandal ‘Panama Papers’

PANAMA CITY/ORANJESTAD – Compania y personanan di Aruba y Corsou tambe ta aparece riba e  lista ‘famoso’ di hende y of compania di cual informacion priva financiero a wordo comprometi, conoci como ‘Panama Papers’.

For di fin di siman, e scandal mundial di ‘Panama Papers’ ta den noticia, cu tin hopi hende nervioso y segun informacion cu NoticiaCla.com tin, posiblemente na Aruba tambe. E ‘papelnan’ aki ta contene un cantidad di 11.5 miyon documento confidencial crea pa e provedor di servicio corporativo Panameño ‘Mossack Fonseca’ di e Aleman Jürgen Mossack y Panameño Ramon Fonseca, -ambos residencia na Pamana- ,  cu ta ofrece informacion detaya di mas di 214.000 compania offshore, incluyendo nan identidad y nan directornan.

NOMBERNAN DIVULGA

E documento ta divulga nombernan manera 5 hefe di estado actual manera di Argentina, Iceland, Saudi Arabia, Ukraina y United Arab Emirates.  y mas. E ta contene documentonan desde añanan ’70 y ta contene 2.6 terabyte (volumen cybernetico hopi halto) di informacion, duna na e corantnan Aleman Süddeutsche Zeitung na 2015 y na e consorcio internacional di periodista basa na Washington (ICIJ). E papelnan a wordo distribui pa 400 periodista y 107 organisacion di media den mas di 80 pais. E prome informacionnan a keda publica dia 3 di april ultimo, y a compronde cu e lista completo lo wordo publica na comienso di mei di e aña aki.

ARUBA Y CORSOU

Loke ta haci e caso aki relevante ta cu pa Aruba tambe e caso aki ta conta, unda cu NoticiaCla.com a compronde cu un total di 27 compania ta aparece riba e lista, 3 cliente y 30 accionista. Pregunta grandi ta cua ta e companianan cu ta aparece riba e lista aki y kico tur lo por keda divulga di e companianan, e clientenan y e accionistanan. Mas ainda, si ta trata tambe di politiconan posiblemente. Corsou tambe no a scapa y ta mustra cu pa e isla bisiña, tin como 30 compania cu ta aparece riba e lista, 2 cliente y 11 beneficiario y 95 accionista di cual informacion ta plama. Atrobe, no ta conoci y no por a verifica ainda ki tipo di informacion ta plama di Aruba y Corsou y si enberdad esaki por ta ‘peligroso’ pa e respectivo persona y of companianan envolvi. NoticiaCla.com su investigacion ta sigui riba e caso aki. Loke por bisa awor, cu Wikileaks mes, a publica un mapa mundial di tur e paisnan cu ta involucra, y aki por mira con Aruba y Corsou tambe ta implica.

Bron: NoticiaCla

Geef een reactie

Het e-mailadres wordt niet gepubliceerd. Vereiste velden zijn gemarkeerd met *