WILLEMSTAD – Ta simplemente inkreibel ku un supuesto korant, a lo menos nan ta pretende ku e ta un korant, por skibi kiko ku nan ke , ora ku nan ke, sin buska drechi si loke nan a skibi ta korekto of laga. Ta inkreibel ku nan por hasi esaki sin tin su reperkushonan pa ku e korant en kuestion. Pa un motibu of otro, sea ta pa rabia of envidia, e korant Ultimo Noticia a disidi di saka un artikulo ku potret di 20 hende ku supuestamente RST ta kana kune pa ser interoga den e kaso di asesinato di Wiels. Sea nan no ta kompronde e daño inmenso ku nan ta hasi na hende su reputashon of simplemente nan no tin kunes basta e korant bende. Paso esei tambe ta otro problema. Hende ta gusta redu.

No ta importa si e artikulo ta basa riba realidad of no. No ta por nada National Enquirer ta e korant mas bendi na mundu. Sikiera National Enquirer ta skibi artikulonan profeshonal. Kontrali na e porkeria ku Ultimo Notisia ta skibi. Pret ta ku nos a bin kompronde ku ta un persona ku e mes tambe ta inklui den e potretnan, ta skibi e artikulo.

Pa ta mas eksakto ta trata di un politiko eksistente ku pa kolmo ta bou di investigashon di korupshon i labamentu di plaka. Ta su taktika di inklui su mes tambe den e potretnan pa no lanta sospecho riba su mes persona. Pa kolmo ta e mes ta e sospechoso mayor den e kaso di Wiels. Mi ta spera ku su chef sa ku ta e mes ta skibi e kosnan aki.

No kabe duda ku mester lanta un organisashon ku mester vigila e tipo di kosnan aki i sankshona e korant severamente. E posibilidad ta eksisti ku por eksihi rektifikashon, pero den nos kaso, ta perdementu di tempu.

Na spaño tin un dicho al kaso: De bagazo nos se hace caso, de basura menos.  T’esaki ta Ultimo Noticia. A ni pa papel di WC e no ta sirbi.

Bron: Notisia360