Opinie door Felix Pinedo
Siman pasá riba dianan 21 i 22 di yüni 2017 Profesor dr. Arjen van Rijn, un eminensia riba tereno di ‘staats- en bestuursrecht’, a duna su remarkenan riba hinter e asuntu entorno ponementu di e asina yama ‘community boxes’.
Raad van Advies a laga sr. Arjen van Rijn skibi un nota entorno e tópiko menshoná, den e rapòrt riba trabounan di Raad van Advies den 2016. Den e nota aki profesor dr. van Rijn ta bisa bon kla ku hinter e asuntu di ponementu di ‘community boxes’ i tambe keda sin entregá pòst na adrèsnan individual tabata algu kontra lei. Profesor van Rijn ta sigui bisa ku loke a sosodé ta kompletamente sin ningun base legal.
E siudadano sr. Felix Pinedo for di 2015 a hiba un lucha kontra di e partikularidat aki bisando ku e minister(nan) tabata permití Cpost International hasi algu kontra di lei.
Pinedo a keda skibi karta pa minister VVRP, Parlamento, Defensor di Pueblo i Ministerio Públiko. Te awe despues di mas ku un aña Ministerio Públiko no a kontestá.
Pinedo ta kontentu ku un eminensia, manera profesor dr. Arjen van Rijn tambe ta di mesun opinion ku su persona ku tabatin pa ya dos aña. Defensor di Pueblo den e rapòrt ku a keda publiká dia 13 di òktober 2016, rondó e partikularidat aki, a kondená e manera ku e minister(nan) i Cpost International a aktua i a konsiderá e manera di a atendé den e kaso aki komo deskabeyá.
Pinedo ta di opinion ku ta en general no a duna e atenshon ku esaki meresé na e rapòrt di Ombudsman. Awor ku un eminensia manera profesor dr. van Rijn a kaba ku e manera di aktua di e minister i Cpost International, ta di spera di tende komentario riba e partikularidat aki di, Parlamento i otro entidatnan renombrá di komunidat.
Si Raad van Advies a laga profesor dr. Arjen van Rijn skibi un nota asina den e rapòrt di Raad van Advies, probablemente Raad van Advies ta di akuerdo ku e ponensia di e profesor.
Pinedo a trese dilanti ku e no por keda sin bisa ku el a mustra dede den un komunikado riba Bureau Telecommunicatie Post en Utiliteiten, bisando ku nan tambe a faya di no a aktua kontra di e fayo di e minister i Cpost International.
Pinedo tabatin komprenshon pa e situashon ku Cpost ta(bata) aden. Hinter e proyekto a tuma lugá ilegalmente.
Promé ku a tuma un medida drástiko asina i move hinter un pueblo sin tene kuenta ku esnan desabilitá, grandinan etcetera por a konsiderá otro manera pa atendé ku e asuntu aki.
Mi a komprondé ku tin algun hende ku awor ta bai korte riba e partikularidat ku nan no ta risibí pòst na kas.
Na mi opinion nan ta lat ya ku e minister anterior di VVRP, a publiká un dekreto na sèptèmber 2016, den kual el a legalisá i ta permití Cpost pa dal bai ku e proyekto. Esei no ta nifiká sí ku tur lokual ku a tuma lugá promé ku e dekreto nobo a ser publiká, tabata ilegal.
Felix Pinedo,
Curacao