Djaluna mainta 7 di mei nos a risibí un yamada di un reportero di un radio emisora ku a informá nos ku Fundashon Akshon Sivil lo entregá un keho kontra nos bufete di abogado FCW-legal.

Mas lat nos a skucha na e mesun radio akí kon siudadano Ruben Suriel di Fundashon Akshon Sivil ta splika e keho. Ta bon pa bisa ku nos mes no ta disponé di e keho.

Nos a keda sumamente asombrá, pero despues nos a bin kòrda ku George Lichtveld, algún luna pasá, a anunsiá asuntu di entregamentu di un keho. E anunsio akí el a hasi durante e kaso di rektifikashon ku FCW-legal tin kontra dje den Korte. FCW-legal a demandá Lichtveld pa e echo ku el a mancha nòmber di FCW-legal sin base i ku e mester rektifiká e kosnan negativo ku el a skirbi den korant tokante FCW-legal. Lichtveld a anunsiá ku lo e sigui. Dicho hecho. En bèrdat el a sigui mancha nòmber di FCW-legal, e biaha akí e difamashon a kana via Fundashon Akshon Sivil.

Durante tratamentu di e kaso mas o ménos tres luna pasá, den korte diripiente Lichtveld a lanta i trese dilanti un asuntu di kobramentu dòbel. Segun Lichtveld FWC-legal lo a kobra inhustamente tantu e montante di retainer komo montantenan adishonal. Esaki tabata promé biaha ku nos a tende e kos akí i nos a keda sumamente asombrá.

Dirèkt despues di e kaso, via un komunikado pa prensa, FCW-legal a splika ku loke Lichtveld a bisa no ta korekto i nos a splika dikon. E no ta korekto, pa motibunan masha simpel pa splika.

1. Kasonan di ámtenar no tabata kai bou di e akuerdo di retainer. Esei ta enserá ku FCW-legal, meskos ku tur otro kantor di abogado ku tabatin retainer, mester a kobra e kasonan aki separadamente. Tur otro kantor mester a hasi mesun kos

2. Ora e periodo di un aña pasa i e akuerdo di retainer no ta bálido mas, hopi biaha Gobièrnu ta sigui manda petishon pa hasi kaso den korte. Tur kantor ku haña un petishon semper lo hasi e kaso i kobra pa esaki.

Kemèn un splikashon hopi simpel.

Despues di e komunikado ku nos a manda pa prensa biaha pasá, tur hende a komprondé e asuntu i no tabatin niun komentario mas.

Awor ta laga tempu pasa pa via Fundashon Akshon Sivil start ku e mesun asuntu aki ku ya tabata klarifiká den e komunikado pa prensa. E biaha akí ta bai asina leu di asta entregá un denunsia. Nos mes no tin e denunsia.

Ta bon pa bisa ku esun ku entregá un denunsia falsu siendo el a haña splikashon, pues e sa masha bon ku loke el a denunsiá no ta bèrdat, ku e persona akí ta kastigabel pa lei. (artikulo 2:142 – kastigu di un aña)
Nos no por konkluí nada otro ku henter e entregamentu di keho akí ta ku meta pa daña nòmber di FCW-legal. FCW-legal a splika kon e kos ta hinká den otro pero tòg ta sigui ku difamashon.

Den FCW-legal su afán pa komprondé kiko tin tras di e akshon akí, nos ta yega na e siguiente punto. Ta konosí ku Lichtveld ta traha i kobra na SONA. SONA ta e organisashon ku ta den notisia último tempu pa motibu di no por responsabilisá kasi 200 mion di plaka di pueblo. FCW-legal a kordiná un evaluashon ku algun eksperto di Belgika a hasi riba e proyekto di hòspital nobo. E ekspertonan a konklui den nan rapòrt ku SONA (i Lichtveld) no a traha nan trabou i ku mester hala SONA i Lichtveld un banda. Pues di e forma akí Lichtveld aparentemente ta tuma revancha.

FCW-legal

Glenn Camelia

8 mei 2018