PHILIPSBURG- Parlamento di St Maarten kier invita fraccionnan di tanto Aruba y Corsou, pa discuti ‘kico ta pasando den Reino (Hulandes)’. Esaki ta e proposicion di lider di partido UP, Theo Heyliger dialuna den parlamento, segun e corant di e isla ‘The Daily Herald’ ta raporta. Parlamento di St Maarten a discuti e ‘aanwijzing’ cu Hulanda a duna nan gobernador Eugene Holiday diabierna ultimo.
Manera NoticiaCla.com a raporta den fin di siman, parlamento di St Maarten tabata hopi indigna cu e ‘aanwijzing’ y a debati e topico aki dialuna atardi. Heyliger, cu ta poni pa bira e proximo prome minister di e isla, dialuna a propone pa St Maarten invita varios fraccion di parlamento di tanto Aruba como Corsou pa bin St Maarten y discuti e asunto, y pa uza parti di e presupuesto di Parlatino, pa paga pa esaki.
“Loke cuminsa na St Maarten, no ta caba na St Maarten. E no ta caba na St Maarten, sino e lo continua riba otro islanan di caribe hulandes” Heyliger a sigui bisa. Segun Heyliger, St Maarten ta na vispera di establece regla y ley. Indicando cu St Maarten tabata prome den Reino pa pasa leynan di screening pasa den parlamento, e ta puntra pakico tin un instruccion pa e gobernador, si no tabatin ningun motibo pa kibra e leynan aki. E tin un problema cu e violacion di e leynan actual, tanten cu Hulanda tabata purba den nan intento. Segun Heyliger, ta asina e proceso a cuminsa ora cu su defunto welo, conocido lider Claude Wathey a keda encarcela hopi aña pasa. E reunion a termina dialuna anochi, y ta poni pa presenta un mocion diaranson mainta ora cu e reunion continua. Mayoria di esnan den parlamento, un pa un a presenta nan argumento tambe, y tabata conoci cu mientras cu tur tin argumentonan diferente, un cos a resalta cu ta cu nan no ta acepta e ‘aanwijzing’ ricibi for di Hulanda, y lo bringa esaki sigur.
Mientrastanto na Aruba, prome minister Mike Eman a confirma na NoticiaCla.com dialuna cu Aruba ta sostene St Maarten den su intento pa resolve e impasse cu e tin cu Hulanda. Pero cu sosten, Aruba ta hopi specifico ki tipo di sosten e ta dispuesto pa duna. Como tal a duna su minister plenipotenciario di Aruba na Hulanda ok pa durante reunion di conseho di minister di Reino, sostene St Maarten den su intento pa haya derecho riba e asina yama ‘intern appèl’ . St Maarten, sinembargo ainda no a haci e peticion ey. Mientras cu Aruba no conoce e discusion ‘inhoudelijk’ entre St Maarten y Hulanda, Aruba pues ta dispuesto pa sostene St Maarten cu sosten pa e isla haya un ‘intern appèl’.
Den combersacion cu NoticiaCla.com, premier Eman a confirma dialuna cu e la tuma contacto cu prome minister Sarah Wescott Williams, cu Aruba ta sostene St Maarten riba su sosten y a mustra tambe cu si St Maarten kier sosten pa exigi pa haya conseho di Raad van State, locual Aruba tampoco no a haya. “Esaki si St Maarten a pidi y esey nos gevolmachtigd minister a sostene tambe. Pero lamentablemente esey tambe no a wordo concedi” Eman a bisa. Eman ta recorda cu e tambe a haye den un situacion asina recientemente ora cu Hulanda tabata den impasse cu Aruba, y unda cu Aruba a bringa Hulanda riba e aanwijzing cu e la haya. Na e occasion ey tambe Aruba a pidi Hulanda pa tanto derecho riba appèl
Bron: NoticiaCla