Polis ta pidi yudansa di publiko pa yuda den solushon di e kaso aki

Otro kaso di asesinato pa kual polis ta pidi yudansa di komunidat pa yega na solushon dje krímen, t’e atrako fatal djabièrnè 6 di mart último den zona liber na Hato.
Polis a duna grabashon dje atrako riba e negoshi ku ta dil den oro liber k’e speransa ku siudadanonan por rekonosé kualke un dje tiponan ku ta paresé riba esakinan. Nos ta pidi televidentenan pa pone masha atenshon riba e grabashon ku nos lo pasa promé ku speed normal i despues slow motion.

Riba e dia fatal, un trùk ku ta transportá plaka a yega na e negoshi pa entregá i rekohé algun merkansia di balor. Despues ku e dos empleadonan di seguridat aki ya tabata un ratu den e establesimentu, rekohiendo merkansia, nan a keda sorpresá pa 6 hòmber ku a penetrá den e negoshi.

Tur 6 tabatin kara tapá i bistí den trahe di kamuflahe di guera. Un òf mas di e sospechosonan aki, na momentu ku nan a topa kara – kara ku nan víktimanan, a lòs algun tiru dirigí riba nan. Un bala a alkansá un di funshonarionan di seguridat mortalmente na e parti ariba di su kurpa. E otro empleado di seguridat tambe a risibí un tiru, pero kontrali na su kolega ela sali basta di bon for di esaki.

Despues di nan akto, e seis kriminalnan a logra bai ku un kantidat di bara di oro for di e sitio. Dòkter di polis ku a presentá na e sitio a konstatá morto di e hòmber Zhadiro Zevenhuizen, nasé na Kòrsou dia 22 di ougùstùs 1978. Polis ta pidi uin i tur ku ta dispone di informashon tokante di e kaso di atrako ku morto aki na zona liber na Hato, pa tuma kontakto ku polis riba 917 of e liña anónimo 108.

Te ainda polis no tin ningun pista den e kaso aki, pero si ta deseá na solushona esaki mas pronto posibel. Kuerpo Polisial ta konta riba koperashon di komunidat.

Bron: Telecuracao