Na okashon di e Seremonia Ofisial di Konmemorashon di ‘60 aña Statüt’
na Monumento di Outonomia, dia 15 di desèmber 2014
Sesenta aña pasá Kòrsou, formando parti di Antia, tambe a marka historia ora Statüt a keda firmá dia 15 di desèmber 1954. E tempu ei Statüt, ku te awe ta e lei di mas haltu den Reino, tabata regardá e 3 paisnan Antia Ulandes, Sürnam i Ulanda.
Despues ku Sürnam a bira independiente na 1975 i Aruba a haña su status di pais outónomo na 1986, awor pa mas ku 4 aña kaba, Kòrsou tambe ta un pais outónomo, formando parti di Reino Ulandes konhuntamente ku Aruba, St. Maarten i Ulanda.
Den kuadro di nos empeño relashoná ku formashon i konstrukshon di nos nashon Kòrsou, nos ta duna honor awe tantu na Statüt mes komo tur esnan ku a realisá e obra eksepshonal aki. I nos ta duna e honor aki na nos monumento nashonal di outonomia ku Gobièrnu a laga renobá kompletamente.
Nos hóbennan ta forma un parti importante di e akto konmemorativo aki. Ta importante pa nos hóbennan sa mas di e nifikashon i historia di Statüt. Ta p’esei, Gobièrnu entre otro a laga traha un karta edukashonal ku alabes por fungi komo foyeto informativo ku nos a manda pa tur skol di enseñansa di fundeshi i skol avansá. Ademas, e ta optenibel den forma digital pa henter Pueblo.
E akto di firmamentu di Statüt 60 aña pasá a nifiká sigur, pa Pueblo di Kòrsou, un paso gigantesko riba e kaminda di emansipashon. Introdukshon di Statüt sin mas tabata e apertura prinsipal pa nos mes por a kuminsá atendé nos asuntunan interno i asina determiná tambe nos propio destino.
Durante e promé 20 añanan di Statüt, esta di 1954 pa 1974, nos a pasa den e nos promé eksperensha di tin un gobernashon propio ku norma-, prosedura- i strukturanan demokrátiko ku a remplasá e relashon di poder ku tabata dominá nos komunidat durante e era kolonial.
E proseso aki no a tuma lugá bou di sirkunstansianan faborabel, partikularmente pasobra e industria mas grandi, esta refineria Shell, a disidí di redusí e kantidat di trahadónan drástikamente loke a kousa desempleo grandi, hopi tenshon laboral i un lucha tenás di sindikatonan eksigiendo partisapashon p’e klase trahadó i mas atenshon pa e proseso di Antianisashon.
No opstante e situashon fastioso aki nos komunidat a sigui traha duru i ku kabes na laira i animo a sa di surpasá e difikultatnan i logra introdusí diferente leinan sosial, un plan di desaroyo di mas aña i krea speransa nobo speshalmente pa e futuro generashon dor di introdusí un sistema di beka i ‘enseñansa general pa tur’. Indudablemente e lucha di entre otro Dòktor Moises Frumencio da Costa Gomez i Dr. Efrain Jonckheer, ambos di felis memoria, no tabata dirigí únikamente riba outonomía estatal pero tambe pa stimulá i oumentá alabes e akseso pa prinsipalmente e Pueblo humilde na sirkunstanshanan soshal-ekonómiko mas faborabel a base di derechonan igual pa un i tur.
Durante e añanan 1974 te 1994 tambe nos komunidat mester a enfrentá retonan grandi den e afan i esfuersonan pa logra i mantene un sosiedat ekonómikamente i polítikamente stabil. Entre otro Shell a sera e refineria na 1975 i riba tereno estatal Aruba a separá for di Antia na yanüari 1986, despues di añanan dominá pa diskushonnan fuerte tokante struktura estatal. Un biaha mas nos komunidat a demostrá karakter i solaridat pa, ounke e problemanan tabata hopi i difisil pa solushoná, tòg hasi uso di e oportunidatnan ku presentá pa, den bon koperashon ku otro, sigui pa dilanti.
Despues di aña 1994 e enfoke a keda riba diskushonnan kontinuo tokante struktura estatal i ta despues di diferente referèndum finalmente Pueblo di Kòrsou a bin skohe pa bira un pais outónomo den Reino huntu ku Aruba, St. Maarten i Ulanda.
Echo ta ku esaki ta e realidat polítiko aktual i ta nos tur su obligashon pa sigui dediká tur nos energia pa duna kontenido real na e mandato di Pueblo di Kòrsou i e espíritu di Statüt pa asina logra adelanto i progreso bèrdadero di nos komunidat.
E akto di firmamentu di Statüt 60 aña pasá a ilustrá tambe e importansha i nesesidat pa tin bon koperashon i relashonnan konstruktivo entre tur partner den Reino i kon por atendé asuntunan komun, manera relashonnan eksterior, nashonalidat i defensa.
Statüt i e mandato di Pueblo di Kòrsou ketu bai ta reflehá e vishon ku tantu Kòrsou, Aruba, St. Maarten i Ulanda mester edifiká nan nashon riba nan propio forsa ku e disponibilidat pa boluntariamente respaldá i sostené otro. Ta imperativo pa e forma di koperá ku otro ta unu madurá, semper basá riba rèspèt, teniendo kuenta ku e responsabilidatnan ankrá den Statüt.
Gobièrnu di Kòrsou ta keda positivo i optimista. Di nos parti nos lo sigui stimulá un diálogo habrí i mantené un relashon konstruktivo ku tur partner den Reino i paisnan amigu den region i rònt mundu, naturalmente a base di rèspèt, igualdat i benefisio mutuo.
Ta importante pa nos keda realisá ku Kòrsou outónomo ta trese ku’ne un konhunto di derechonan signifikante, pero tambe debernan i un responsabilidat grandi pa kada un di nos. Gobièrnu ta gradisí tur esnan ku ta komprometé pa sigui duna nan aporte pa Kòrsou avansá. Ban huntu, ban kumpli ku e responsabilidat mayó di realisá e perspektivanan nobo ku lo resultá den un mihó kalidat di bida di nos siudadanonan.
Na nòmber di Gobièrnu di Kòrsou, mi ta felisitá Pueblonan di Kòrsou, Aruba, St. Maarten i Ulanda ku 60 aña di Statüt.
Bron: YvesCooper